Prome (sub) horcan di temporada, Alex a baha di forza

MIAMI - Imagen di satellite awe mainta ta indica cu despues cu dos dia pasa a forma un tormenta subtropical for di un sistema di presion abou riba Atlantico oost, esaki ta bahando di forsa. E tormenta subtropical aki a haña e nomber di Alex. Mientras tanto Alex a bira un horcan. Centro di Alex tabata situa awe merdia 2’or, na 32.6 noord y 28.0 west y tabata moviendo den direccion noord noord-oost. Alex lo bai afecta islanan Azores awe nochi y diabierna y no ta un menasa pa nos region.

AREA DI PRESION

Horcan Alex a forma for di e area di presion abou riba Atlantico y cu tabata produci labaderanan afectando gran parti di e islanan den Caribe, incluyendo Aruba. Alex inicialmente tabata un tormenta subtropical. Un tormenta subtropical tin caracteristicanan di tanto tropico como no tropico y tin un area hopi grandi di biento rond di dje. Otro caracteristicanan notabel cu ta diferencia un tormenta subtropical for di uno tropical ta cu su centro ta relativamente friu, compara cu di un tormenta tropical cu ta relativamente cayente y su manera di obtene energia cu ta diferente for di un sistema tropical.

Solamente un otro horcan a forma den luna di januari den Atlantico a parte di Alex y esey tabata horcan Alice (Alicia) na 1955.