Conseho di Minister ta sigui reuni sin Minister Oduber

ORANJESTAD – Un persona cu ta ausente den e Conseho di Minister di awe mainta ta Minister Otmar Oduber. Manera ta conoci, ainda no tin un solucion pa e ‘desenlace’ di siman pasa ora cu e Minister cu cartera di Turismo, Transporte y Cultura, a ‘distancia’ su mes di resto di e Gabinete, cintando diferencianan serio di opinion riba e curso di e Gabinete. Awe mainta tin hopi speculacion cu e Conseho di Minister awe mainta, lo trata e situacion, y cu ‘intencion’ lo ta pa ‘bula’ Oduber afor. Esaki no por a wordo confirma pero esey ta loke tabata wordo papia awe mainta.

MOCION DI DESCONFIANSA

Un di e scenario nan presenta lo ta pa, via parlamentarionan di e propio partido, presenta un mocion di desconfiansa contra e mandatario concerni, y asina bah’e como minister. Fuentenan cerca di e proceso no por a confirma esaki. Hecho ta, cu for di dia cu NoticiaCla.com a raporta den forma di primicia riba e asunto, no tin ningun desaroyo nobo cu por a raporta ariba. No tabatin mas reunion entre e mandatario en cuestion y Prome Minister Eman.

SITUACION FASTIOSO

Mientrastanto mas dia pasa, e situacion ta bira mas fastioso pa e gabinete mirando cu otro siman mester cuminsa tratamento di presupuesto unda cu tur minister mester ta presente. No ta conoci con esey lo continua si e asunto aki no keda resolvi. Despues di e desenlace di siman pasa, tabatin apenas dos encuentro entre Ministernan Eman y Oduber, y no tin nada mas programa entre nan dos.