ATA: Crecemento den 2016 pero conciente di reto y tendencianan

ORANJESTAD - Aruba Tourism Authority lo enfoca mas riba nos destinacion y calidad di e experiencia vacacional e aña aki. Asina e hefe di A.T.A., sui generis, Ronella Tjin-Asjoe a bisa diahuebs mainta durante un encuentro cu prensa. Segun e CEO, cu trabou duro di promocion y reunionnan strategico cu socionan, mara na inversionnan cuantioso den e producto Aruba, sin duda lo asisti den duna su frutonan, tanto den e cantidad di pasaheronan via avion como via crucero, pero tambe A.T.A. a subraya cu manera tur aña retonan no lo falta y mester ta conciente di esaki.

VISION PA 2016

Den e vision pa aña 2016, Aruba Tourism Authority tin como meta un crecemento di 5.5% den cantidad di turistanan di estadia, un crecemento di 6% den ‘tourism receipts’, crecemento di averahe 9% den RevPar (entrada pa camber disponibel) durante e periodo di 2014 pa 2017 y un crecemento di 3% den turismo crucero, compara cu aña 2013 cu tabata nos miho aña.

DESAROYO NOBO

Papiando di cantidad di camber, tin un desaroyo nobo cu ta bale la pena duna atencion pasobra, uno cu tin influencia y lo sigui tin mas influencia riba estadia nan, na lugarnan convencional riba nos isla pero tambe mundialmente. Ta trata aki di e fenomeno di ‘Sharing Economy’, unda hende individual ta huur su propiedad cu un otro. Asina a crea plataformanan nobo y moderno manera ta ‘Airbnb’, ‘Homeaway’ y ‘Flipkey’. Tambe di operadornan online existente, cu ta ofrece esakinan tambe manera Expedia. E ta un tendencia cu mester keda bon na bista, pasobra e ‘trend’ ta mundial y ta creciendo. Aki e calidad di locual ta ofrece ta carnidal. Den e contexto aki A.T.A. lo continua cu ‘accommodation rating’ den 2016.

ALL INCLUSIVE

Otro tendencianan y retonan clave, cu tin o por tin un impacto ariba Aruba, como destino turistico y varios ariba turismo mundial ta inclui: 1) tendencianan pa cu e modelo di hotel ‘All-Inclusive’ cu por nifica mas demanda y volumen, pero cual lo por resulta den menos ingreso pa bishitante cu ta keda y draai den nos economia 2) presionnan riba rendimentonan pa medio di turismo, cu ta resulta di entre otro e cambionan mara na situacion socio politico na Venezuela, cual ta afecta e fluho di ken ta bishita y kiko nan ta laga atras averahe pa cabes, ta wordo afecta dor di costo di haci negoshi cu ta pone presion riba rendimento y inversion, y cambionan en general den patronchi di gasto bou di consumidornan, for di diferente mercado sea considerando situacion economico of ‘shift’nan manera crecemento di E Commerce 3) Cuba y e impacto di e destino aki mirando e potencial apertura di e mercado Mericano pa Cuba. ‘Caribbean Hotel and Tourism Association’ ta indica cu apertura di Cuba pa e mercado Mericano, lo impacta e destinonan den su cercania mas, y lo impacta otro nan menos. No por kita, no obstante, cu e lo por conduci na fluho di Mericanonan cu lo bishita pa motibo di curiosidad y lo pone presion riba competencia den Caribe. Mester remarca si cu Republica Dominicana, como tambe Mexico (parti den zona Caribense) ya ta competidornan hopi mas grandi cu Cuba, cu ya Aruba a bin ta enfrenta cu exito durante ultimo añanan.  

TURISTA DI CALIDAD

Na 2016 A.T.A. lo enfoca mas riba nos destinacion y calidad di e experiencia vacacional, cual de facto ta un di e puntonan di mas importante pa e aña. Bou di e departamento ‘Destination Services’, tin como meta, pa ehecuta un cantidad di proyecto. Asina A.T.A. ta asumi un papel mas prominente den facilita y implementa esfuersonan, mara na maneho di e destinacion y elevacion di calidad di e oferta, cu nos ta representa como product turistico, Aruba. Cu esaki mester logra entre otro atraccion di e bishitante, cu por laga averahe mas atras den nos economia -e bishitante afluente cu mas poder di compra- (cu ta di perfil di ingreso anual desea, cu ta dispuesto pa paga mas pa un vacacion na Aruba (pasobra e producto / experiencia ta uno di calidad) y cu lo por laga mas atras), desaroya e destinacion y producto Aruba, conforme e maneho turistico desea cu ta inclui mas enfoca riba inovacion y sin lubida servicionan adicional. E enfoke di A.T.A. den 2016 lo inclui inversion den: entre otro nos playanan, eleva nos calidad di servicio (‘Aruba Certification Program’, introduccion di ‘Quality Standards’, continuacion di ‘Duna Aruba e Miho di Bo’), den seguridad, educacion turistico, cultura, San Nicolas, nos Centro di Ciudad, como tambe den provecion di informacion pa medio di borchinan, ‘directories’, wifi gratis y continuacion di e ekipo di ‘Happy Information Officers’. Tambe lo enfoca na un manera mas amplio riba e satisfaccion cu e industria turistico ta trece cu ne bou di comunidad local. Na aña 2011 a organisa un investigacion ‘Happiness Index’ (un investigacion introduci pa organisacion mundial di turismo), pues awor despues di 5 aña lo midi esaki atrobe. Satisfaccion ta esencial pa maneho pero tambe pa un miho calidad di servicio.