Ex minister ta exigi clarificacion di actual minister

ORANJESTAD – Segun ex Minister di Salubridad Publico, Booshi Wever reaccionando riba e articulo di NoticiaCla, cu a keda publica e siman aki (14 di januari) di un entrevista cu a sostene cu e Minister di Salubridad Publico, encuanto e calidad di servicio di laboratorionan na Aruba, no por confia e laboratorionan na Aruba. Wever cu tabata minister di Salubridad Publico den e gabinete anterior Oduber, a repasa e articulo y exigi un splicacion di e mandatario actual.

CITA ARTICULO DI NOTICIACLA

Citando e articulo, Wever ta mustra cu e minister a declara cu: “tin exigencia di calidad cu t’ey, y AZV no ta cera contract si no tin ISO acredita. E problema ta cu e 'level' di acreditacion no ta suficientemente halto. E t’ey, pero mester ta miho”. Segun Wever, cu e declaracion aki e minister ta duna di conoce, cu no por confia e laboratorionan na Aruba, pasobra nan no ta cumpli cu e exigencianan internacional di bon calidad?

TIRA PIEDRA SCONDE MAN

“ E minister, manera a bira su custumber caba, ta tira piedra, sconde man. Ta menciona cu e calidad di e Laboratorio di Gobierno - cu recientemente den un acto protocolario masha formal a pasa na man di hospital - nunca a cumpli cu e exigencianan di calidad internacional,” Wever ta bisa. Den e mesun rosea e minister ta duna di conoce cu ningun laboratorio na Aruba ta cumpli cu e nivel halto di cuido di calidad, apesar cu nan tin un acreditacion, pasobra e audit lo por a wordo comprometi door di esun cu ta paga pa e investigacion (“wie betaalt, bepaalt”).

CONSECUENCIA DI DECLARACION

E ex minister, cu actualmente tin su propio partido politico, ta puntra kico ta e consecuencia di e declaracion imprudente aki haci door di e persona cu ta encarga pa ley pa cumpli cu reglanan di bon gobernacion y tambe defende e interes di e pueblo cu a pone su confiansa den e gobierno aki? “Mi por a tuma nota den e “handboek gezondheidsrecht” publica na 2008, cu un derecho fundamental di e pueblo ta pa ricibi un cuido medico di calidad halto, y cu ta e tarea di gobierno pa duna contenido real na cumplimento di e ley aki.” Segun e ex mandatario, nos pueblo, y particularmente esnan cu ta rekeri ayudo medico, mester por confia cu e servicio cu nan ta haña, ta sigur, pa asina evita un mal trabou pa motibo di mal informacion.

HABRI CAMINDA PA DUDA

Cu e declaracion encuanto funcionamento di laboratorionan na Aruba, Minister Schwengle ta habri caminda pa duda, y esey ta contra e derecho fundamental di e pueblo. “ Con ami como patient di prostaat, por confia riba e test di laboratorio na Aruba? Mi specialista lo basa su tratamento riba e resultado ricibi di laboratorio, y si en caso e resultado no ta di confia, anto mi bida ta core peliger,” Wever a sigui bisa. “ Mi ta exigi como ciudadano di pais Aruba y como patient, pa lo mas pronto posibel bin clarificacion riba e expresion haci door di e minister di salubridad” Wever a sigui bisa. E minister recientemente a pasa e ley di BIG aki na Aruba, y esey kiermen cu tur esnan cu ta ofrece cuido, mester cumpli cu e exigencianan di bon calidad di cuido. “No tin mester di warda ni un siman, y sigur no 2 pa 3 aña pa ami y nos pueblo haña e garantia cu e servicio brinda door di laboratorionan, ta bon. Esey ta mi derecho como ciudadano biba na Aruba,” Wever a finalisa bisando.