Landslaboratorio oficialmente a pasa pa Horacio Oduber Hospital

ORANJESTAD – Diaranson tabata un dia historico pa hospital. Esaki segun Minister di Salubridad, Alex Schwengle, na momento cu a haci e traspaso di e Landslaboratorio pa bira un laboratorio di hospital. “E ta un dia pa celebra!” e mandatario a bisa na e ocasion ey. A pasa e maneho di e laboratorio di gobierno den man di Stichting Ziekenverpleging Aruba SZA. “Awe nos ta celebr'e oficialmente.” E ta un historia largo di por lo menos 20 aña unda cu diferente gobierno a purba di haci e traspaso aki sin logra.

BENEFICIO PA HOSPITAL Y ARUBA

Segun Schwengle, e no ta un logro solamente pa e hospital sino pa e pais, pasobra ta esencial pa por confia riba un bon laboratorio. E grupo di mas grandi ta e trahadonan mes cu pa añanan a wordo neglisha y tranca den nan desaroyo personal, awor ta haya un miho chens. “E no ta un logro di Minister Schwengle, e ta un logro di nos tur,” e mandatario a bisa.

HOSPITAL TIN E MIHO LABORATORIO AWO

Di parti di hospital, director general Ezzard Cilie, a mustra cu e ta un stap grandi pasobra e parti diagnostico ta asina esencial. “Den e sentido ey, finally nos a logra haya nos propio laboratorio,” Cillie a bisa. Segun e director, no tin un lugar tecnicamente miho ekipa cu e laboratorio aki. “Gewoon no tin. Si bo pone e parti humano tambe ta mescos,” Cillie a sigui bisa. Segun e director, e parti diagnostico y cuido ta esencial pa e ta bon y di confia, y sigur na tempo.

SITUACION HURIDICO DI E TRAHADONAN

Pa loke ta e trahadonan, nan ta haya un permiso pa traha bou di e stichting nobo, cu ta pone cu nan ta den servicio temporal di e stichting. Nan ta keda ambtenaar pa e periodo di un aña, durante cual nan tin cu dicidi si nan ta keda ambtenaar of ta pasa pa e sector priva. “Semper gobierno tin e plicht pa cualkier ambtenaar si e dicidi cu e no kier bay mee cu e stichting, e tin e obligacion pa busca un ‘passende functie'. Algo dificil den e caso aki mirando cu pa un analista, no ta facil pa haya trabou pasobra no tin laboratorio di gobierno mas. Pero tur esaki a keda papia caba cu e sindicato,” Schwengle a sigui bisa.

PARTI FINANCIERO DI E TRAHADONAN

E parti financiero sigur tambe tabata un topico special, unda cu e mandatario a confirma cu tabatin un presupuesto semper pa e laboratorio di gobierno, y un areglo complica entre gobierno y AZV riba e tereno aki. “Esey a wordo resolvi. Tin afspraken traha entre gobierno, AZV, y hospital con ta bay financia esey. E calculacionnan ta cu e prome aña e lo costa un tiki mas cu e tabata costa prome, pasobra mester inverti den e trahadonan,” Schwengle a bisa. Despues por baha gasto di e laboratorio. A calcula cu por spaar por lo menos entre 4 pa 5 miyon pa aña den e laboratorio so, segun e mandatario. Y segun e mandatario, cu un maneho mas rigido, por evita entre otro di haci testnan na cantidad cu realmente no mester.