Di dos reunion entre Eman y Oduber sin solucion ainda

ORANJESTAD – Reunion entre Prome Minister Mike Eman y Minister Otmar Oduber, a continua diaranson merdia, y atrobe e reunion ey tabata uno largo aunke no a yega na otro ainda. Y mirando cu no tin mas reunion planea, e situacion ta keda uno tenso. Fuentenan cerca di e combersacionnan a confirma na NoticiaCla.com, cu e contenido a sigui riba e topiconan di preocupacion, aunke cu nada concreto no a sali afo. E preocupacion awor ta, e reunionnan di otro siman ora cu cuminsa trata presupuesto mirando cu cos no a keda resolvi ainda, segun e fuentenan cerca di e proceso a bisa.

REUNION CU OTRO MINISTERNAN

E mesun fuentenan a sigura, cu tabatin hopi interes di ambos banda den e reunion entre e dos ministernan. Ademas a compronde cu premier Eman a haya e puntonan di Oduber hopi valido. Tur esaki a pone cu a cuminsa un ronda di combersacion entre Prome Minister Mike Eman y otro ministernan ayera mes. E prome minister cu a wordo yama, tabata Minister di Husticia Arthur Dowers, cu despues di un session cortico, e minister a sali bay. E hecho cu e mandatario ey a wordo yama ta pasobra, e ta un di e ministernan di cual Oduber tabatin problema cu ne pa loke ta criminalidad. NoticiaCla.com a compronde cu reunionnan awor lo continua entre Prome Minister y coleganan minister, pero cu no tin mas reunion planea entre Oduber y Eman mes.

SITUACION TA KEDA TENSO

Fuentenan cerca di e combersacionnan a mustra cu mientras cu e reunionnan ta continua, e situacion ta keda uno tenso. Esaki pasobra otro siman pues e reunionnan di presupuesto ta cuminsa den Parlamento, unda cu sin un resolucion cu Oduber, esaki por tin su consecuencianan pa tratamento di e presupuesto. Manera ta conoci, contrario na pasado, unda cu tabata trata e presupuestonan separa di cada minister, awor e presupuesto ta wordo trata como uno so, cu ta pone cu tur minister mester ta presente henter ora. Y cu e ambiente ainda no resolvi entre e mandatarionan, e por bira un problema si e dia di tratamento yega y e asunto no ta resolvi.

NO TIN MAS REUNION PROGRAMA

A compronde cu mientras cu Eman a reuni 2 biaha cu Oduber, y cu no tin reunion mas planea, partidonan a bay for di otro sin cu a soluciona e problema. No ta conoci cu despues cu Eman reuni cu demas colega ministernan, e por yama Oduber pa un follow up. Pa awor, no tin ningun otro reunion programa entre Oduber y Eman. Cos cu no tabata e caso despues di e prome encuentro, unda cu asina cu e reunion ey a caba, a programa un siguiente reunion.