Schwengle no ta convenci cu acreditacion di laboratorionan ta suficiente

ORANJESTAD – Minister di Salubridad Publico, Alex Schwengle no ta convenci cu ‘varios’ laboratorionan cu no ta di gobierno, ta acredita manera debe ser. Mientras cu e mandatario no kier menciona nomber di e laboratorionan, NoticiaCla.com a compronde cu e ta referi na e compania cu tin 6 laboratorio priva na Aruba, esta Laboratorio Familiar. E mandatario ta bisa mesora si, cu esey no kiermen cu esun di gobierno si ta corectamente acredita. “Pa'mi, 'I am not impressed' di e 'acreditatie' cu nan ta presenta na e momentonan aki,” Schwengle a bisa. E ta sigura cu esey ta su opinion como profesional y mandatario. Di otro banda e mandatario ta admiti cu e Laboratorio di Gobierno, cu ta esun mas grandi di Aruba, mes no tin acreditacion, pasobra Gobierno no a cumpli tampoco.

WIE BETAALT BEPAALT

Combersando cu otro instancia na Hulanda, a compronde cu e auditnan haci pa e laboratorionan local, ta enberdad un audit, pero no e audit cu bo kier. “Bo kier un 'high level audit' y e mester ta completamente independiente di e laboratorio mes.” Esey ta nifica cu si e laboratorio mes ta paga pa busca un hende pa acredit'e, e ta demostra su papel di ISO (e acreditacion), siendo cu e dicho ‘wie betaalt, bepaalt’ ta bin na mente. Esey no ta nifica cu e laboratorionan ta di mala fe. “Pero nos (Gobierno) no a exigi e calidad cu nos merece. Mi no ta culpa laboratorio, sino mi ta culpa nos mes (Gobierno).” Como minister, Schwengle a priminti di lo bay cambia esaki.

LANDSLABORATORIO MES A FAYA

Admitiendo cu gobierno mes a faya den no acredita su laboratorionan, e ta conciente cu e ta corta su cara bisando esey. “Ki bo kier. Mi ta conta e cosnan manera cu nan ta,” e mandatario a admiti. Y mes momento el a admiti cu esey ta e motibo pa cual el a drenta politica, pa por haci e cambio nan e burocracia cu ta tarda e.o. e proceso di acreditacion. “Mi tambe tabata hay'e iritante cu cos no tabata logra,” e mandatario ta referi ora cu e tabata traha como medico. E no ta un falta di gana di haci'e, sino cu e proceso pa yega na e cambionan ta dura simplemente mucho largo pa keda cla.

TRES AÑA PA KEDA CLA CU LEY

E intencion ta pa caba cu e leynan necesario e aña aki y despues duna e laboratorionan 2 aña di tempo pa keda cla. Si pa e ora ey nan no cumpli, lo cera tur laboratorio cu no ta cumpli. Pues na tur, pa aki tres aña tur cos mester ta ‘ok’, pa loke ta e acreditacion. Mientrastanto si algo mester pasa den e tres aña, esaki lo keda controla. Tin exigencia di calidad cu t'ey y AZV no ta cera contract si no tin ISO acredita. E problema segun e mandatario, ta cu e level di acreditacion no ta suficientemente halto. E t'ey, pero mester ta miho.