Feco Gomez di AMAK geschokt cu cancelacion festival di Calypso

ORANJESTAD – Presidente di Asociacion di Musico di Corsou, Feco Gomez a keda di shock ora cu el a tende cu e festival di calypso na Aruba a keda cancela. Gomez tabata na Aruba, pa promove e proximo festival di tumba di Corsou otro siman, y a papia cu NoticiaCla.com riba e cancelacion di e festival di Calypso na Aruba. “Mi no sa kico a pasa, pero mi ta lamenta pasobra e festival di calypso ta mescos cu nos festival di tumba, cu tur hende ta gosa na Corsou,” Gomez a bisa.

LANTA AMA

Segun Gomez, for di tempo di defunto musico Hildward Croes ta bezig cu MUSICA, e tabata hopi close cu Croes pa lanta e asociacion di musico na Aruba esta AMA. “Mi ta lamenta cu te ainda esey no a bira un realidad.” E ta mustra cu esey mester bira e solucion pasobra AMA ta duna e artista e bos den decisionnan. “Ora bo tin un fundacion, semper bay ta un grupo di hende ta tuma decision.”

Gomez a wordo pidi pa ta envolvi den e proceso pa lanta e asocacion nobo di Aruba, unda cu el a manda tur documento di Corsou, for di aña pasa pa reuni cu tur musico. A haci un apelacion pa dera hacha, wak e interes di e musiconan di Aruba na prome lugar. “Na Aruba tin hopi bon musico, hopi bon artista, anto mi ta kere cu e plataforma di calypso pa demostra calidad, mester wordo manteni.”

NO A WORDO ACERCA AWORAKI SI

Den e caso aworaki si, Gomez no a wordo acerca pa wak si por remedia e problema cu tin aworaki cu calypso no a sigui. “Mi tabatey aña pasa, a pone un fecha di 22 di november como target pa logra esaki. Ma manda un stappenplan, pero no tabatin contacto mas.” E problema cu tin, segun Gomez, ta cu tin un cuerpo cu ta tuma decision, cu mester haya confiansa di tur hende. “Mester tin un persona neutral, cu tin cu pone oponentenan sinta na mesa cu otro. Si tin oponente den cualkier proyecto, si bo no combersa, bo no ta saca e diferencianan di opinion nunca. Mas grandi so nan ta bira,” Gomez a sigui bisa. “Tin biaha cos malo tin cu sosode, pa por trece solucion. Tur hende tin cu realisa pa bay mas cauteloso. Decisionan emocional a tuma lugar, cu a pone cu esaki a sosode. Ora cu cosnan asina pasa, bo tin cu laga emocionnan trankil pa esey,” Gomez a bisa finalmente.