Sevinger: No a dicidi ainda si Rincón ta haya tereno

ORANJESTAD – E tereno cu comerciante Roberto Rincón a pidi for di 2014, ainda e no a haya otorga. Por lo menos esaki e mandatario ta sigura, den un comunicado cu el a manda prensa diaranson anochi. Asina e mandatario ta reacciona riba documentonan, cu a mira ‘luz di dia’ riba un tereno cu e mandatario lo a otorga e comerciante, cu awe ta cera na Merca. E mandatario ademas ta sigura cu na 2014, no tabatin ningun acusacion contra e comerciante.

NADA DI ACUSACION

E mandatario ta sigura cu na 2014 ora cu e comerciante Venezolano, Roberto Rincon a manda una carta pa tereno pa e minister, no tabatin ningun acusacion contra e comerciante. Asina Sevinger a purba splica. Asina e ta purba defende su mes di e acusacionnan, cu tin e dianan aki riba documentonan, cu a keda publica den e medio Solo di Pueblo y cu otro medionan manera Bon Dia Aruba a sigui cu ne. E tempo di e carta di tereno, Rincón a mustra como un simpel inversionista cu kier a inverti na Aruba.

HACI MIHO INVESTIGACION

Segun Sevinger, e ta compronde cu oposicion (MEP) tin un trabou pa haci, pero ta kere cu mester averigua miho y bin cu argumentonan di mas peso. Cu esaki ta referi na acusacionnan, cu su persona ta faborece empresario Venezolano Roberto Rincon, pa haya tereno na Aruba. Segun e mandatario, mescos cu hopi otro peticion cu ta yega na su oficina, e ta haci un evaluacion na e momento ey pa duna su opinion. El a splica cu ora e ta skirbi riba un carta ‘Dezerzijds Akkoord’ no ta un ordo di dje pa duna tereno ciegamente, pero ta notifica cu di su banda y na e momento ey, no ta wak motibo contra pa e departamentonan encarga duna atencion na e peticion.

DESORDO

E mandatario a yama e carta cu oposicion a plama, como ‘haciendo desorden’, pero atrobe ta splica cu e tempo di e carta, no tabatin nada di acusacion contra dje. Segun Sevinger, e ta admiti cu Rincón a cumpra un edificio riba tereno erfpacht na Balashi, otorga pa otro gobierno algun aña anterior. Ta un peticion Rincón a haci pa tin e tereno banda di dje tambe. Mirando cu Rincón a desaroya esaki ‘bunita’, a duna ok pa departamentonan di gobierno sigui cu e proceso, ‘cu ta inclui investiga cu tin algun motibo pa nenga e peticion’. Segun e mandatario, a duna e e anotacion riba e carta otro nificacion mas leu di loke e ta. “Di mi banda e ta ok, djey e ta bay pa e departamento cu mester haci su trabou. Nan por bin cu argumento y conseho cu no por honra e peticion y di mi parti, e ora ey, ta djis notifica esey,” tabata e palabranan di Minister Sevinger.

PETICION NO A KEDA HONRA AINDA

Segun e mandatario ta sigura den su comunicado, tin cu dicidi despues di henter un tramite, si e persona ta haya opcion riba e tereno. “E peticion aki no a yega asina leu ainda,” Minister Sevinger a sigura den e comunicado. “Mi no ta compronde dicon hende ta kere cu Minister a firma y mañan bo ta haya tereno!” e mandatario a expresa añadiendo cu “Si na e momentonan aki e departamentonan bisami cu nan a investiga y tin motibo pa duna un conseho negativo, e no lo haya e tereno tampoco.” Minister Sevinger no ta wak pakico ta haci tanto escandalo riba un carta cu no ta compromete na nada y basa riba informacion di dos aña pasa. E ta kere cu e ta haciendo su trabou manera mester ta y ta para tras di e decision cu el a tuma.

CONTROL DI OTRO DEPARTAMENTO

Segun e mandatario, mescos por ta pa cualkier otro compania estableci na Aruba.“Si departamento di gobierno bisa, cu nan no tin motibo pa duda riba e fuente di recursonan di e director y Banco Central of Veiligheidsdient mustra cu nan no tin obhecion, anto e como minister no tin pia pa para riba dje y nenga e peticion. Esey lo duna e director motibo te hasta pa bay Corte,” Sevinger a bisa, mustrando cu e la haya luz berde di tur e departamentonan menciona.

PROCESO CANANDO SU CAMINDA

Finalmente Minister Sevinger ta informa, cu actualmente e proceso ta canando su caminda, investigacionnan ta wordo haci y e ta wardando conseho di e departamentonan concerni, relaciona cu e peticion aki prome cu ta tuma un determinacion.