Bikker: Resto di gabinete Mike Eman II mester saca su conclusion

ORANJESTAD – Parlamentario Andin Bikker, lider di PDR a cuminsa su prome conferencia di aña, cu un elogio pa e labornan di Minister Otmar Oduber, refiriendo na e ultimo desaroyonan rond di e retiro anuncia di e mandatario. Segun Bikker, “awor cu e minister cu si ta traha a anuncia cu lo evalua su retiro e gabinete Eman of alomenos esnan cu ta hunga tambe evalua nan retiro.”

TRABOU EHEMPLAR

Segun Bikker, Oduber a haci un trabou ehemplar riba tereno di turismo, cargando nos economia, y si el a anuncia cu lo evalua su retiro ta pa motibo cu e ta hopi frustra cu e mal maneho di cierto ministernan, vooral esnan Husticia y Infrastructura. El a bisa cu mundo ta riba su cabes awor pasobra e persona cu ta cargando nos economia, cu ta trahando y cu no ta perde tempo pa sinta critica ‘links and rechts’ y e persona cu no ta busca excuse, el a anuncia cu e ta tuma su retiro, y e otro ministernan ta keda ‘gewoon’ sinta eynan.

MOCION DI DESCONFIANSA HUSTIFICA

Bikker a bisa cu tur mocion di desconfianza cu a wordo pasa contra Minister di Husticia a haya hustificacion, pasobra no ta oposicion ta haciendo fastioso manera e minister aki ta pensa, oposicion a haya razon tocante mal maneho di husticia. Pero tambe e Minister di Infrastructura a duna motibo pa e minister dinamico a anuncia cu e ta bay retira, pasobra e ta dunando permiso 'links en rechts' pa construi hotel den areanan residencial, contra leynan di regulacion di tereno. Segun Bikker, e ministernan aki, sikiera e dos menciona, mester saca nan conclusion y realisa cu e desaroyo aki no por sigui.