Sentencia riba caso boutique hotel Ocean Z no ta cla ainda

ORANJESTAD – Awe mainta huez a informa partidonan cu e no ta cla cu e veredicto den caso di e boutique hotel Ocean Z, y como tal esaki por bin posiblemente despues di merdia. Abogado di e grupo di habitante cu a cuminsa e caso, Dello Gomez, a confirma cu e sentencia lo por keda cla despues di merdia, en bes di riba e mainta di custumber. Tur diaranson mainta corte ta presenta un cantidad di veredicto cu ta ‘riba rol’. Pues mester warda un poco mas pa e sentencia.

SENTENCIA TEMPORAL

Tabata na december aña pas cu huez a dicta un medida temporal stipulando cu operadornan di e boutique hotel Ocean Z, -esta Zizzu properties-, mester a para nan operacion mesora y si no cumpli cu esaki lo mester paga un multa di 25 mil florin te na maximo di 10 miyon florin. Motibo di esaki ta, cu tanto e construccion pa e hotel y restaurant, ta ilegal. Esey huez a dicta awe mainta den un caso sumario. Abogado, mr. Lincoln “Dello” Gomez, a confirma na NoticiaCla.com, cu e paro di operacion mesora, ta por lo menos te dia 13 di januari 2016, ora cu corte dicta un proximo sentencia. (Por lesa e veredicto temporal aki)

KEHO DI HABITANTENAN

Tabata un grupo di habitante di Malmok, cu a entama e caso, mirando cu e operacion di hotel tabata causa disturbio y no tabata na agrado di e calidad di bida di e habitantenan den besindario. Huez a cuestiona durante e caso, con por ta cu doñonan di Ocean Z por tabatin consehonan interno pa minister den nan poder. Algo cu no mester ta e caso. 

REACCION DI ZIZZU PROPERTIES

Despues di varios intento, a logra haya contacto cu e propietario di e compania Eva Zissu cu a bay di acuerdo pa duna su reaccion riba e caso. El a sigura NoticiaCla.com cu tur su cosnan tabata bon regla y cu mayoria di loke ta wordo bisa, no ta cuadra. A haci varios cita pa por bishita e propiedad, pero pa motibo di inconveniencia di banda di Zissu, esaki ainda no a tuma lugar. Ta keda pendiente pues pa e por a presenta su banda di medaya, cu e tabata dispuesto pa duna pero no a logra ainda.