Ex general Hugo Carvajal bek den noticia riba asunto di El Chapo

CARACAS – Despues di un ausencia riba pantaya, e conocido ex general Venezolano Hugo Carvajal ta den noticia atrobe. E siman aki el a haye ‘involucra’ den e noticianan rond di e capo di droga Joaquin Guzman, cu diabierna ultimo a wordo recaptura na Mexico. E entrevista cu actor Sean Penn a haci cu “El Chapo” tambe a bira conoci mientrastanto. Y ta aki ta unda cu Carvajal ta reaparece. Segun informacion di ABC España, Carvajal tabata instrumental den e set up di e entrevista, durante un encuentro cu e yiunan di Guzman, riba isla Margarita. “Mi conoce e isla. Pero mi no tabata riba e isla na 2015 y awor comienso di 2016,” Carvajal a desmenti e siman aki na prensa Venezolano. “Mi no conoce e yiunan di El Chapo, ni primo ni ruman ni ningun hende,” Carvajal a sigui desmenti.

AMIGO DI ROBERTO RINCÓN

Carvajal su nomber a cay recientemente, ora cu e comerciante Venezolano Roberto Rincón a cay cera na Merca, acusa di soborno y labamento di placa. Rincón su amistad cu Carvajal a resulta di ta hopi cera, mirando cu informacionnan cu a presenta, ta mustra cu ta avion di Rincón su yiu a wordo usa, pa transporta e ex general pa Aruba na 2014, cu a resulta den su detencion di 4 dia, y cu a hala atencion di Merca mesora. Esaki pasobra Carvajal ta busca pa Merca pa traficacion di droga entre e cargonan, y a wordo deteni na Aruba riba peticion di gobierno Mericano. Pero cu intervencion di Hulanda, a laga Carvajal bay, cu ta algo cu autoridad Mericano no a gusta niun tiki.

DESAPARECE FOR DI MAPA?

Despues di su regreso pa Venezuela, el a wordo mira mesora riba television Venezolano cu e presidente di e pais. Despues no a tende nada mas di dje, te cu a tende cu e lo a muri den un accidente of un atentado. Algo cu despues a resulta di no ta berdad. E siman aki, Carvajal, eligi como diputado, a reaparece den noticianan di e canal Colombiano NTN24.