No a traha suficiente luga di parkeer pa tour bus riba Welcome Plaza

ORANJESTAD – Mientras cu e trabounan riba Welcome Plaza na waf ta avansando, tin problema cu e lugarnan di parkeer di tour bus. E problema ta cu aparentemente no a tene cuenta cu e cantidad grandi di tour bus cu mester di por parkeer (60), y a traha lugar pa solamente 15 bus parkeer. Minister di Transporte Otmar Oduber, a confirma e problema awe mainta na NoticiaCla.com y a lamenta e situacion na NoticiaCla.com pero a referi pa e director di Aruba Ports Authority, Jossy Figaroa pa wak unda e problema ta. E director mientrastanto no ta disponibel pa e proximo simannan.

INSPECCION HACI

Manera ta conoci, recientemente tabatin un inspeccion riba e tereno unda cu Minister di Transporte a bay pone su mes na altura di e situacion, y aki a bin tuma nota di e problema. Pues asabiendas cu tin mas lugar necesario, toch a traha apenas 15 espacio. A compronde cu ta haciendo tramite pa remedia e situacion, pero mirando cu e trabounan ta practicamente cla, esaki lo nifica un inversion adicional pa por acomoda tur e busnan cu ta usuario di e facilidad.

COMPARACION CU HOSPITAL

Bon Dia Aruba a raporta esaki tambe awe den su edicion, y a compara e situacion cu e problema di hospital, unda cu a tuma un ‘decision’ cu a resulta incorecto, cu resultado cu awor mester paga mas placa pasobra ‘no a inclui e plan pa un operatie kamer adecua’ den e plan pa hospital nobo. A coregi e situacion na e instante ey, pero no sin cu esaki a costa hospital hopi mas miyon extra.

WARDA REACCION DI DIRECTOR

Den e caso aki, no ta conoci pakico no a conta cu e aspecto aki, y si no remedia esaki e lo keda un problema unabes cu e plaza keda inaugura oficialmente dentro di poco. Manera a bisa caba, a tuma contacto cu e director di APA, pero e no tabata disponibel segun su oficina, y lo bolbe na trabou te otro siman. E suplente ainda no tabata disponibel, pa duna su comentario riba e situacion actual cu tin riba e plaza.