Sindicato cu menasa di accion na aeropuerto

ORANJESTAD - Despues di varios luna di negociacion, gerencia di AAA NV (aeropuerto Reina Beatrix) no ta mustrando ningun clase di comprension pa cu su empleadonan. Asina presidente di Sindicato di Trahadonan di Aruba (STA), Diego de Cuba a bisa NoticiaCla.com awe mainta. Segun de Cuba, e trahadonan tin e deseo di bay resorta bou di fondo di pensioen di APFA, pero gerencia kier e empleadonan resorta bou di un otro fondo di pensioen. STA ta considera cu e negociacion a pega formalmente como tal y no ta descarta un accion di protesta na aeropuerto.

PROBLEMA CU FONDO

Segun de Cuba, e fondo cu AAA kier pa e trahadonan no ta combini nan. Esaki ta formando un obstaculo pa cu resto di asunto nan cu mester keda atendi cu nan pa locual ta trata e CAO, vooral e parti financiero. “ Awor gerencia di AAA NV kier pone cuchiu na garganta di e sindicato, pa acepta e otro fondo di pensioen sino no lo mira mehoracion den e CAO actual. STA no ta acepta e tipo di menasa nan aki di ningun compania y menos di AAA NV,” de Cuba a sigui bisa.

MEDIADO DI GOBIERNO

Directiva di STA ta evaluando si ta bay pidi mediador pa interveni y sigur lo solicita un reunion cu caracter di urgencia cu e minister encarga cu Aeropuerto y tambe cu e "RVC" di AAA NV. Tambe de Cuba a mustra cu e sindicato no ta descarta un posibel accion di protesta ariba Aeropuerto. No kier bisa ki dia ni ora, pero cu si e bin, e ta uno duro.