Polisnan sospechoso caso Henriquez dilanti huez fin di februari

DEN HAAG – E cinco agentenan policial, cu ta sospecha di ta involucra di e morto di Mitch Henriquez aña pasa zomer, lo presenta dilanti huez fin di februari awor. Asina e portal “Omroep West.nl” ta raporta awe. Ta trata di un asina yama 'regiezitting' tras di porta cera. Tur partido por duna nan comentario kico tur ainda nan lo kier mira investiga.

E CASO

Manera ta conoci, e Arubiano Mitch Henriquez a fayece despues cu el a keda deteni durante e festival 'Night At The Park' na Zuiderpark. El a fayece pa falta di oxigeno durante e detencion aki. Na october di aña pasa, rijksrecherche a finalisa e investigacion riba e morto di Henriquez.

FIN DI FEBRUARI

Fin di februari Ministerio Publico y e abogadonan di e polisnan sospechoso, por indica si tin cosnan cu mester wordo investiga. E Huez Comisario di corte ta determina si esey lo sosode tambe. Ora cu e investigacion ey ta cla, Ministerio Publico lo dicidi si e polisnan lo wordo persigui.

NO INDEPENDIENTE

Ultimo dianan e famianan di Henriquez, via nan abogado, a manda critica fuerte riba e caso aki. Nan no tin confiansa mas cu e investigacion ta uno ‘independiente’. E polisnan ta liber y lo a palabra nan declaracionnan hunto. Ademas, e polisnan cu a sospechoso, tin e mesun bufete di abogado cu ta representa e polisnan cu tin cu testigua. Como tal e famianan tin miedo cu e informacion lo wordo intercambia.

OM TA DESMENTI PRECUPACION

Ministerio Publico sinembargo ta bisa cu no tin ningun indicacion pa tin intercambionan entre e polisnan. No por desmenti esaki, pero tampoco e no ta prohibi segun OM. Mes momento OM ta bisa, cu no mester tin duda den integridad y/of profesionalismo di e abogadonan cu ta representa e polisnan.