A detene ultimo sospechoso den caso maltrato na San Nicolas

ORANJESTAD – E ultimo persona den e caso di maltrato serio di un homber na december na San Nicolas, a keda deteni awe tardi. Vocero di Ministerio Publico, Ann Angela a confirma esaki pa NoticiaCla.com. Ta trata di e persona JJW. Hunto KZ van L. y SMC, JJW ta forma parti di e trio cu a maltrata e homber U.W seriamente. Durante e maltrato, a cap man di e victima full afo, kibra wesonan y a haya dos tiro den rudia.

E DETENCIONAN

E caso mes a tuma lugar net despues di pasco, dia 27 di december aña pasa na San Nicolas. E investigacion aki a cuminsa y ya pa 5 di januari di e aña aki, a pone man prome riba van L, sigui pa detencion di SMC dia 10 di januari y awe e ultimo cu ta JJW. Pa Ministerio Publico ta considera esaki un logro grandi, mirando con lihe e caso aki a keda resolvi. Awor tur tres sospechoso tin cu responsabilisa nan mes dilanti un huez. E estado di e victima no ta conoci pa NoticiaCla.com