Ministernan Oduber y Eman a topa otro porfin awe merdia

ORANJESTAD – E reunion awe mainta laat pa merdia, entre Minister Otmar Oduber y Premier Mike Eman a tuma lugar. 'Lo continua cu e reunion despues,’ tabata un di e unico cosnan cu por a tende. NoticiaCla.com a haya confirmacion di fuentenan cerca di e combersacionnan, cu e reunion a dura basta, y cu a toca e lista di temanan di precupacion cu Minister Oduber tabatin. Sinembargo detayes no ta conoci. Kico esey ta nifica,  tampoco no ta conoci. E reunion a cuminsa den careda di 11'or di mainta y a termina basta despues di merdia. 

HOPI INTERES PA REUNION 

Tabata interesante nota cu e interes pa e reunion aki tabata hopi grandi, y cu na cas di partido berde tabatin basta hende en espera, sea ta pa e resultado di e reunion of pa mustra sosten na partido. Di tur forma, e prome reunion a tuma lugar, y ta spera awor riba e continuacion. Ta spera cu den curso di proximo oranan, por haya mas detayes di e reunion y wak kico esaki ta conduci na dje. Sea ta sigui gabinete cu Otmar Oduber aden, of cu si definitivamente Oduber no ta bolbe despues di 1 di maart.

E NOTICIA

Tabata NoticiaCla.com cu awe mainta a bin cu e primicia, cu awe mainta Ministernan Otmar Oduber y Mike Eman tabata programa pa topa otro. Fuentenan cerca di e combersacionnan a confirma esaki na NoticiaCla.com awe mainta. Sinembargo e lugar si a keda un misterio ainda. Manera ta conoci for di siman pasa cu Minister Oduber a bin afo y señala e problemanan interno den e gabinete y papia di crisis, e situacion ta tenso den e gabinete. Lider di fraccion di e partido, Rene Herde dialuna a yam'e un ‘problema’ cu mester di un solucion. Expectativanan ta varia riba e resultado di e reunion di awe mainta entre e dos ministernan, y e resultado por determina futuro di tanto e Gabinete y of e minister en cuestion.

REUNION A TARDA PA TUMA LUGAR

Segun e fuentenan a confirma na e portal, awe mainta e reunion lo a tuma lugar aunke no por a divulga e ora, pa no crea sensacion innecesario. Hecho ta, cu despues di varios dia di speculacion, e reunion tan spera porfin ta tuma lugar. E reunion mester a tuma lugar for di siman pasa, unda cu e prome mandatario a bisa caba cu for di ‘day one’, esaki mester a tuma lugar e siguiente mainta cu e ‘crisis’ a keda anuncia. Esey no a tuma lugar y a keda specula riba e dianan aki. E ta importante pasobra tanten cu esey no tuma lugar, tin un incertidumbre grandi den e seno di e partido.

COMBERSACIONAN DEN SENO 

Manera cu e portal aki a raporta caba dialuna, combersacionnan ta tumando lugar den seno di partido, pero e combersacion mes entre Minister Otmar Oduber y Minister Presidente Mike Eman, no a tuma lugar ainda. E intencion segun Oduber a bisa NoticiaCla.com dialuna mainta, tabata cu e reunion entre e cu Minister President Eman mester a tuma lugar dialuna. “Lo tabatin un reunion awe, pero e no ta tuma lugar awe mas,” Oduber a sigui bisa. Trabou ta continua mientrastanto, y e mandatario ta sigui cu su labornan. E situacion ta keda pues status quo.

REUNION APLASA PA DEN SIMAN

E reunion planea ta tuma lugar den curso di siman aki. Personalmente, Oduber ta mustra cu trabou ta continua. Manera el a bisa, tin trabounan cu ta 'pending' y cu e kier keda cla cu ne. El a reuni ayera mainta cu colega Minister di Salud Alex Schwengle, riba asunto di baseball pues trabou ta sigui. Ademas ayera mainta a inspecciona plaza Padu pa mira con esaki lo desaroya. Algo cu a sosode tambe diabierna ultimo.

NO TA REUNI DEN CONSEHO DI MINISTER?

E mandatario a desmenti cu e no ta reuni den Conseho di Minister. “Mi ta atende reunionnan cu tin cu atende,” Oduber a bisa. Pero segun Oduber, nunca elo a bisa cu e no ta participa den un Conseho di Minister tanten e asunto aki no keda resolvi.

POINT OF NO RETURN

Mientrastanto NoticiaCla.com tin informacion, cu e situacion no ta nada bon y cu internamente tur cos ta mustra cu e kiebro ta mustra di ta uno, cu no por wordo remedia mas. Den fin di siman y dialuna NoticiaCla.com a haya comentario di tur e skinanan ministerial y tur ta mustra den direccion cu Oduber ta riba un ‘point of no return’. Esaki ta nifica cu e fecha di 1 di maart ta practicamente un hecho, cu ta nifica cu e retiro di Oduber pa e fecha ey ta eminente.