Top general Mericano preocupa cu posibel atake di ISIS den Caribe

WASHINGTON – Un top general Mericano a mustra preocupacion serio cu un grupo chikito di militante di ISIS por comete acto di teror den nacionnan caribense. General John Kelly, comando di e base na Miami (SouthCOM) a declara diabierna na Pentagono cu 150 extremista Islamico a bandona e region caribense aña pasa pa uni cu e bringadornan di ISIS den medio oriente. Esey ta 50 mas cu e aña anterior. E general no ta bisa cua isla(nan) den Caribe ta un menasa.

MENASA MAS GRANDI

Segun Kelly, e menasa mas grandi no ta e extremistanan cu ta bay pa entrena y bringa cu ISIS, pero esnan cu ta keda atras. Kelly ta supervisa e seguridad Mericano pa Latino America y Caribe, a bisa cu e gruponan extremista Islamico parce di a manda un mensahe nobo pa esnan cu kier ta jihadista. “E mensahe ta ‘ Enbes di bin aki na Syria, pakico bo no ta djis keda cas y comete un San Bernardino of Boston of Fort Hood’ “. Aki Kelly ta referi na e atakenan terorista cu a tuma lugar na cada un di e ciudadnan aki na Merca aña pasa y esun prome. Siman pasa diahuebs un tirado a proclama lealtad na ISIS na un patruya policial na Pennsylvania.

DI UNDA E ATAKENAN LO BIN

E general Mericano ta bisa cu e supuesto atacante nan lo bin mas sigur di ex colonianan Britanico den Caribe y surpasa su fronteranan. Esnan cu a biaha mientrastanto pa entrena na Syria, lo bolbe Caribe y posiblemente comete e atakenan terorista. E problema di seguridad cu tin, ta e recursonan limita di seguridad cu paisnan di CARICOM (Comunidad Caribense) tin. Kelly ta haci mencion di paisnan manera Jamaica, Trinidad y Surinam, cu no tin e organisacion militar, of su propio version di TSA (Transportacion Safety Administration). “Cualkier loco por causa hopi problema den Caribe pasobra e paisnan ey no tin un FBI, no tin un forza policial manera nos”. Expertonan di seguridad den Caribe a simpatisa cu e idea di Kelly y a confirma e precupacionnan aki tambe.