Prijs pa bari di petrolio yegando 30 dollar mundialmente

LONDEN – Prijs di petrolio a sigui baha diamars. Y tin indicacion cu e prijs di 30 dollar pa bari ta dilanti porta. Dialuna e prijs di bari, pa prome biaha den 12 aña, a yega 31 dollar pa bari. Aki na Aruba lo ta interesante pa mira kico ta pasa cu e prijs di gasoline awe. Tur di dos diaranson di luna ta anuncia esaki y esey mester sosode pa awe. Na Aruba e prijs no por conoce un baho, manera riba tereno internacional, debi na e areglo di hedging na 90 dollar pa bari te 2017. Mientrastanto ta haciendo tur intento pa remedia e situacion ey tambe.

CALCULACION DI PRIJS

E bahada di prijs di bari di petrolio pues awe, ta pone cu expertonan ta mira cu pa e siman aki caba e prijs lo yega 30 dollar caba. For di 2014 e prijs di petrolio a practicamente colapse y no a ‘recupera’ mas. Den apenas e prome dianan di 2016, e prijs a bira 17% mas barata. Awe mainta tempran e tarifa pa un bari di petrolio Mericano tabata na 30,60 dollar. Brent oil a bira 3% mas barata y tabata costa 30,62 dollar pa bari.

MOTIBO DI CAIDA DI PRIJS DI PETROLIO

E motibo di e caida di prijs ta debi cu e oferta (di petrolio) ta mucho mas grandi cu e demanda. E inquietud continuo riba mercado Chines, a yuda aumenta e tardansa den crecemento economico mas ainda. China ta e di dos consumidor mas grandi di petrolio na mundo. Companianan grandi manera Morgan Stanley y Goldman Sachs a reduci nan expectativa pa e prijs di petrolio. Nan ta premira cu pa un periodo largo e prijs lo ta den e becindario di 20 dollar pa bari. Esaki lo tin efecto grandi riba companianan di petrolio y gas Mericano, unda cu hopi compania lo bay bancarota. E compania Standard Chartered ta bay te hasta un paso mas lew. “Nos ta kere cu e prijs di petrolio lo por yega $10 pa bari prome cu e mayoria realisa cu e caida aki a bay mucho lew.”