Herde: Partido no ta comenta tanten Oduber y Eman no topa otro

ORANJESTAD – Tanten cu Prome Minister Mike Eman y Minister Otmar Oduber no papia cu otro, e partido mes (AVP ) lo no duna ningun comentario riba e tema. Lider di fraccion di e partido berde, Rene Herde a confirma esaki pa NoticiaCla dialuna merdia. “Manera Prome Minister a anuncia mesora, tanten cu den partido e hendenan envolvi no sinta cu otro, y papia riba cualkier tema cu mester papia, nos no ta bay pafo tampoco papi‘e,” Herde a sigura e portal aki. “Esey ta liña di partido, di gabinete y liña di fraccion lo sigui.”

SOLUCION INTERNO

Esey ta nifica cu riba e substancia, riba kico a sosode, ken a bisa kico etc, ningun miembro di e partido ta duna comentario. “Minister Otmar mes a bisa cu e no a combersa ainda, kiermen cu tanten cu e no combersa, nos tampoco no ta papia riba e tema.” Herde a splica cu ta buscando pa un solucion. “Kico cu mi bisa, lo wordo uza, mal interpreta. Mi ta prefera pa nos soluciona e problema interno,” Herde a bisa, aceptando cu e ta enberdad un problema.