Croes: ‘Rincón no a paga ningun jet, hotel of cuminda pa nos’

ORANJESTAD – Ningun momento, comerciante Venezolano, Roberto Rincón a ‘wine and dine’ Minister Paul Croes (y otronan di e delegacion di Aruba) ora cu e delegacion di Aruba tabata na Houston,Texas. Asina e mandatario a sigura NoticiaCla.com dialuna merdia. “Absolutamente cu no!” Croes a bisa. De hecho, e ta considera e acusacionnan como 'ridiculo y sin base, pa trata na crea un noticia negativo rond di reapertura di CITGO.’ Segun Croes, saca potret y pone riba Facebook no ta logra un reapertura di un refineria. “Esey ta absurdo!” A mustra cu tur loke cu a wordo gasta durante biahe, ta documenta y por demostra esaki tambe cu prueba cu ta Gobierno di Aruba mes a paga tur su gastonan.

CROES TA ADMITI DI A TOPA CU RINCÓN

Segun Croes, e mes a biaha 4 biaha pa Houston,Texas den 2015, den cuadro di negoshacion cu CITGO. Si prensa lo kier mira esakinan (prueba di gastonan) esta e daggeld vergoeding, hotel, ticket di hotel, aerolinea, esaki ta posibel segun Croes. Mes momento Croes ta admiti si cu tabatin contacto cu Roberto Rincón. Mescos cu colega de Meza a bisa na un ocasion, den tipo di ambiente asina ta bin den contacto cu hopi hende, y den e cuadro ey, a topa Rincón. “Pero cu tin un acuerdo entre Rincón cu nos y CITGO, absolutamente cu no,” Croes a bisa. A tuma nota tambe di e situacion cu Rincón ta aden y ta admiti tambe, Croes a mustra, cu Rincón (taba) tin un poder financiero hopi grandi y a mustra di tabata interesa pa apoya Aruba den haya contactonan necesario pa cu CITGO.

RINCÓN NO A PAGA NADA PA DELEGACION

“Señor Rincón no a paga ningun jet, ningun hotel, ningun cuminda pa nos,” Croes a bolbe reitera. Loke ta interesante ta cu Croes ta confirma, cu Rincón tabata interesa algun aña atras di cumpra e refineria di Valero, pero esaki no a realisa. “Tur e noticianan aki, ta kita e logronan di colega de Meza, pa logro di posibel di reapertura di e refineria." Croes a confirma, cu e ta dispuesto pues pa mustra tur documento di biahe pa prueba su punto.

ROBERTO RINCON CERA

For di 16 di december 2015,  Rincón ta cera na Houston, Texas, acusa di ta meti den labamento di placa y a comete soborno cu empleadonan di compania of gobierno. Rincón tabata un di e personanan instrumental, entre gobierno di Aruba y e compania CITGO, pero no esun principal ni e unico. E hecho cu Rincón ta cera aworaki, ta pone cu e atencion ta riba tur loke cu Rincón tabata envolvi aden, incluyendo su proyectonan na Aruba. Esey e orden di aresto pa Rincón mes a establece luna pasa. Dia 1 di februari proximo, Rincón lo tin cu presenta dilanti hues na Merca. Colega Minister Mike de Meza, a desmenti caba cu Rincón lo a paga pa su biahe y otro asuntonan, aunke no asina specifico manera cu Croes a haci awe. De Meza a referi mas bien na e hecho, cu ta buscando cos unda cu no tin.