Ex trahadonan Aura Casino tin prioridad pa un trabou via DPL

ORANJESTAD – Gobierno a duna instruccion na Departamento di Progreso Laboral (DPL) pa considera e ex trahadonan di Aura Casino, como prioridad pa pone nan bek na trabou. “DPL a informami y por informa prensa awe tardi, cu e cantidad di persona cu directamente a haya un trabou por medio di departamento di labor.” Esey e mandatario di labor a bisa NoticiaCla.com mainta. No tabata sa ainda e ora ey, cuanto di cifra ta di hendenan cu a haya trabou, fuera di e 14 nan cu for di un principio a wordo re-ubica, for di ora cu e casino a cera fin di aña pasa.

A HAYA ALGUN TRABOU

Segun Croes algun di nan a haya un empleo, no necesariamente den un casino, pero si den e sector horeca. “Tin varios compania, organisacion cu mester di waiter, bartender etc. Nos ta haciendo esfuerso maximo pa e 30 personanan aki por yega na un empleo temporal.” A pidi abogado, Jiomar Figaroa di FTA, pa concipia un contracto pa e personanan aki, pa na momento cu nan tin un empleo na un otro caminda, cu e ta un contracto temporal. Esaki ta pone cu ora cu e casino habri atrobe, e trahadonan aki por haya nan trabou bek mesora.

COMBERSACIONAN CU DOÑO

Gobierno tin combersacion tambe cu e doñonan di e hotel, cu tin e permiso di e casino, conforme regla di casino no por tene esaki cera pa un tempo indefini, sin mustra posibel reapertura riba corto plazo. “Nos no kier tampoco pa ta asina, cu e personanan aki no por tin un 'overbruggingsperiode' pa asina nan no por yega na un empleo. “Na momento cu e operador nobo tuma e casino over, e lo mester tuma prome tur esnan den servicio cu inicialmente a perde nan trabou,” Croes a bisa. Cu esaki e ta mustra cu e apoyo cu Gobierno ta dunando, ta uno sigur pa percura cu e trahadonan haya un trabou.