Nuboer: InselAir a atende debidamente cu pasaheronan diabierna

ORANJESTAD – Tabata diabierna anochi cu un di e avionan di InselAir Aruba, a haya su mes den problema tecnico, cu a resulta den problema pa e pasaheronan cu mester a biaha e anochi ey. Pasaheronan a altera y dado momento a pidi pa asistencia policial. InselAir Aruba su CEO Frederick Nuboer den fin di siman a confirma na NoticiaCla.com, cu enberdad e anochi ey tabatin un problema tecnico cu un di su avionan. “Nos a purba di soluciona e problema, pero ora cu esaki no por a wordo soluciona ayeranochi, mester a hiba tur pasahero hotel,” Nuboer a bisa NoticiaCla.com den fin di siman.

A ATENDI PASAHERONAN DEBIDAMENTE

Contrario na informacionnan cu a circula inicialmente, Nuboer ta desmenti cu e pasaheronan lo no a wordo atendi cu entre otro cuminda y coy bebe. “Esey no ta berdad. Tur pasahero a wordo atendi cu full atencion door di staff di InselAir,” Nuboer a sigui bisa. Segun e CEO, e station manager mes a bai bek airport despues cu su horario di trabao a caba, y hunto cu coleganan a traha te 4:30 am pa pone tur pasahero afecta den Renaissance Hotel. “InselAir ta gradici e bon cooperacion ricibi di management y staff di Renaissance cu tabata cla pa haci tur posibel pa atende cu e pasaheronan,” Nuboer a sigui bisa.

FAYO TECNICO Y SEGURIDAD

Segun Nuboer, ora a detecta e fayo tecnico den e avion y cu no tabata posibel pa corigi esaki na e momento ey, InselAir a pone seguridad di aviacion na prome lugar y no bula e momento ey. “InselAir ta compronde cu e dedicacion aki ta menos agradabel pa e pasaheronan, pero safety di operacion ta keda na prome lugar pa InselAir,” Nuboer a sigui bisa. Y manera cu Nuboer a desmenti caba cu ningun momento a laga e pasaheronan sin come y bebe, el a sigui splica cu manera a compronde cu lo tin un retraso di mas di 2 ora, a cuminsa busca cuminda y bebida. ”Loke ta pasa ta cu tur negoshi na airport ta cera na e ora ey. Nos a zorg di cumpra cuminda y bebida y a entrega esaki na e pasaheronan na hotel ora nan a yega,” Nuboer a finalisa bisando di e ‘experiencia’ di e anochi ey.