Van Raak: Reunion inter parlamentario uno incomodo

DEN HAAG — “E reunion e siman aki cu e politiconan di Aruba, Corsou y St Maarten tabatin algo ireal. E consulta inter parlamentario di Reino tabata un reunion incomodo.” Esaki miembro di Parlamento Hulandes pa partido SP, Ronald van Raak a skirbi riba e portal di opinion “The Post Online” di e reunion di IPKO, cu a tuma lugar e siman aki na St Maarten. Segun van Raak, e reunion tabata incomodo pasobra a papia cu politiconan cu por bira e topico di e investigacion di e relacion entre e industria di gamble y gobierno.

MOCION

Un mocion cu e hunto cu Parlamentario Andre Bosman (VVD) a entrega aña pasa, a wordo acepta pa mayoria den 'Tweede Kamer'. Specificamente, Gobierno di Hulanda a wordo pidi pa hunto cu Gobiernonan di Aruba Corsou y St Maarten, haci un investigacion di e fluho di placa entre politico y e industria di casino legal y ilegal. Un Parlamentario di St Maarten a wordo sentencia pa netamente e motibonan ey, y tambe tin proceso di traficacion di hende muhe na Corsou, y ademas un proceso di corupcion contra ex Premier Schotte, segun van Raak. Tambe e hecho cu casinonan na St Maarten mayoria biaha ta bashi, pero toch tin un entrada di miyones di dollar.

Fuente: Amigoe y The Post Online