Prome drone cu por transporta hende ta hayando hopi interes

LAS VEGAS – E posibilidad pa hende biaha den un ‘drone’, ta realidad. Por lo menos segun e fabricante chines EHang, cu a haci un demonstracion recientemente di e prome ‘drone’ capaz di transporta (un) persona pa un distancia cortico. Ta trata di e drone “EHang 184", cu ta full automatico cu parce un drone gigante, completo cu su 4 propellernan manera un drone ‘regular’. E presentacion, mirando e popularidad actual di drone riba mercado, a hala masha hopi atencion mes. Mientras cu e ta existi, no ta conoci con lihe e por ta riba mercado comercial.

EXPO

Tabata durante e expo di electronica pa consumidor na Las Vegas, cu EHang a demostra e drone gigante aki. E por transporta un pasahero di maximo 220 liber pa un distancia cortico. E biahe ta controla pa un tablet abordo cu ta manera un cockpit. E pasahero ta scohe su destinacion riba e tablet, y ta relaha mientras cu e drone ta lanta buelo, bula e distancia y aterisa automaticamente. Tur manera cu un drone regular por haci tambe. Segun e fabricante, ya caba a haci por lo menos 100 biahe cu persona abordo y tur tabata exitoso.

SPECIFICACIONAN

Pa loke ta e midinan, e ta un vehiculo cu tin cuater brasa cu 8 propeller, y ta 5 pia halto y ta pisa 440 liber. E tin un porta cu ta zwaai habri ariba y un bahul pa maleta. Un bateria completamente carga (2 ora y mei pa carga), ta laga e drone aki bula 23 minuut cu un velocidad di 62 miya pa ora. E problema di seguridad ta keda un topico di discusion. Mirando cu e ta full automatico, un pasahero no por navega e vehiculo, si e tablet faya of e comunicacion celular kibra. Segun e fabricante, tin un centro di control cu ta opera 24 ora pa dia, tur dia y ta monitor tur buelo y por interveni den situacionnan di emergencia.