Mexico lo cuminsa proceso pa extradita El Chapo pa Merca

MEXICO CITY – Procuraduria General di Mexico a confirma diasabra, cu e proceso pa extradita Joaquin “El Chapo” Guzmán lo cuminsa. Cu esaki Mexico ta confirma, cu e biaha aki si e lo coopera cu Merca pa extradita e narcotraficante aki. Algo cu den pasado Mexico a rechasa na dos ocasion. E documento difundi, ta determina cu Guzmán lo tin tres dia pa e opone, unabes cu present'e cu e comunicado. Ademas e por keda extendi cu 20 dia. Guzmán a keda recaptura diabierna marduga na Mexico mes, despues di tabata fugitivo pa 6 luna largo.

PROCESO LARGO

Mientras cu e por ta un proceso largo, e asina yama Procuraduria General de la República di Mexico, lo traha pa e extradicion keda cla mas lihe posibel. No obstante e bon intencion, ta premira cu e tramite por dura por lo menos mitar aña prome cu ta asina lew.

ENTREVISTA CU SEAN PENN

Mes momento a bira conoci tambe den fin di siman, cu durante e fuga di Guzmán, el a sostene un entrevista cu actor renombra Sean Penn, cu na su turno lo a yuda autoridadnan localisa e narcotraficante, aunke no tin prueba di esey.

MENASA RIBA TWITTER

Mes momento yiu homber di Guzmán, Iván, a post riba su cuenta twitter, cu ‘nan no sa kico nan a haci y den ki problema nan a hinca nan mes,’ refiriendo na e presidente Mexicano y a ‘hint’ cu su tata lo scapa atrobe. ‘ Tur cos cu sosode dos biaha, lo sosode sigur, un di tres bes.’ Pues e yiu homber a manda un menasa directo pa e presidente di e pais tambe. Lesa e tweet aki.