Refunjol: RvS a fiha cuadronan cla riba desempeño di funcion di Gobernador

PALM BEACH (Hilton Hotel) – Un tema durante e discurso di Gobernador di Aruba, Fredis Refunjol, tabata e rol di Gobernador cu manera e Gobernador mes a bisa diabierna, “a haya atencion necesario durante e aña cu a pasa.” Segun Gobernador, como instituto e tin tanto un tarea di Reino como tambe di pais como hefe di gobierno. “Den su instruccion, Raad van State di Reino a fiha cuadronan masha cla tocante desempeño di e funcion di Gobernador.”

TAREANAN DI GOBERNADOR

Y un biaha mas e la delinea su tareanan. “Gobernador ta adverti, informa y conseha,” el a cuminsa bisa. “Sinembargo, esaki ta sosode tras di cortina y ta exigi un caracter confidencial. Aki mi ta nota cu desempeño di e tarea aki di Gobernador, semper ta tuma lugar riba un distancia y cu respet. E primado ta sinta den politica,” Gobernador a sigui bisa.

CHECKS AND BALANCES

Segun Gobernador, den nos sistema democratico, basa riba 'checks and balances', tin –banda di e rol di Gobernador - un rol importante pa otro institucionnan. “Mi ta pensa riba colegionan halto di estado, Parlamento, Controlaria General, Conseho Consultativo. Pero tambe riba Conseho Social Economico, dunadonan di trabou, sindicatonan. Y pa no lubida, for di 2015, Colegio Arubano di Supervision Financiero."