Libertad di expresion sagrado pero no ta 'vrijbrief' pa lastima

PALM BEACH  – “Libertad di expresion ta algo sagrado pero esaki no ta un ‘vrijbrief' pa lastima, lesiona, herida, ofende of pa kibra e otro.” Un Gobernador hopi directo y cu palabranan conciso, a mustra su puntonan durante su discurso diabierna anochi na ocasion di su recepcion di aña nobo. Gobernador Fredis Refunjol den su discurso entre otro, a manda un mensahe fuerte pa tanto e medionan di comunicacion, como esnan cu ta expresa nan mes riba rednan social.

LIBERTAD DI EXPRESION

“Libertad di expresion di opinion ta algo sagrado y ta hancra den nos constitution,” gobernador a cuminsa na bisa riba e tema ey. “Sinembargo, esaki no ta un 'vrijbrief'. Mi ta ripiti, esaki no ta un 'vrijbrief' pa lastima, lesiona, herida, ofende of pa kibra e otro,” gobernador a sigui bisa. Segun gobernador, un prensa liber ta contribui na libertad di expresion y na un debate publico constructivo. “Pues prensa ta hunga un rol importante den informa nos comunidad.”

DEBATENAN BRUSCO ALARMANTE

Pero na final di e tema ey, e mensahe mas fuerte mes a bin. “No tumami na malo, pero mi tin cu bisa cu mi ta haya e forma brusco, e forma fresco di e debate den medionan (social) aña pasa alarmante.” El a pidi mes momento pa esaki ta diferente den 2016.