Gobernador: Polarisacion, un menasa pa nos ‘One Happy and Safe Aruba’

PALM BEACH (Hilton Hotel) – Un di e temanan cu sigur a haya atencion den discurso di Gobernador Fredis Refunjol, ta e constante polarisacion den mundo politico. “Constante diferencia di opinion y comprondemento den partidonan politico, ta percura pa politisacion y polarisacion den nos comunidad,” Gobernador a bisa. “Cu tempo polarisacion ta conduci na escalacion.”

DESTRUCCION DI PARLAMENTO

Ademas Gobernador a referi tambe na destruccion di (edificio) di parlamento, y cu ta ”algo cu nunca mas lo mester sosode den nos democracia.” E tabata inevitable cu Gobernador lo a haci mencion di e suseso aki. “Durante aña cu a pasa, ami a experencia e destruccionnan di Parlamento, nos cas di democracia”. El a considera esaki como "un sucedido masha scur mes, algo cu nunca mas lo mester sosode den nos democracia.” Segun Gobernador, "nos no por nenga cu na Aruba relacionnan ta polarisa den forma creciente." Y cu ne, Gobernador a mustra tambe e peliger cu esaki por tin pa nos industria turistico, cu ta e pilar di nos economia. “Polarisacion ta un menasa pa nos ‘One Happy and Safe Aruba'.” Finalmente riba e tema, Gobernador a recorda, cu si nos no percura pa tur cos ta bon, nos turismo lo sufri. “Turismo ta duna resultado ora tin trankilidad, paz, seguridad y stabilidad.”