Ministernan Eman y Oduber ainda no a reuni cu otro

ORANJESTAD - Ministernan Mike Eman y Otmar Oduber ainda no a topa otro, pa papia riba e 'crisis' cu tin den seno di e gabinete. E intencion, manera cu Eman a bisa diaranson den un comentario na prensa, tabata pa e topa e siguiente dia (esta diahuebs) mes cu Oduber. Pero esey no a sosode. Oduber durante un inspeccion di e trabounan riba Plaza Betico a confirma, cu no tabatin combersacion ainda pero a keda hopi sumier riba e tereno ey. Awe mainta mientrastanto Prome Minister Eman, mester a topa Gobernador pa un audiencia. No ta conoci kico lo a sali for di e audiencia aki. 

VARIOS SCENARIO

NoticiaCla.com a compronde cu tras di cortina, partidonan ta trahando duro riba diferente scenario cu por presenta. A compronde cu tanten cu Oduber cu Eman no topa, Oduber lo no presenta den Conseho di Minister. Pues e situacion ta uno basta fastioso, cu por desemboca den un problema serio pa e gabinete. Serio den sentido cu dependiendo con atende esaki, e por bira un problema mucho mas grandi cu solamente retiro di un minister. 

PROBLEMA POR EXPANDE

A compronde entre otro, cu si Oduber retira sin mas, ta reemplas'e cu un otro of dos minister pa reparticion di e respectivo carteranan. Sinembargo, a compronde tambe cu si Eman acepta Oduber bek, of Oduber dicidi di bay bek mes sin mas, cu su coleganan riba cual Oduber tabatin critica severo, lo no acepta esaki y por rebeldia. Pues e situacion ta uno sigur di crisis, unda cu tur partido ta tratando di un forma mas elegante, di regla e asunto prome cu e bira un problema serio. Y un aña prome cu eleccion, un situacion asina no ta faborece e partido na mando sigur.