Retiro Milton Berlinksi di comision ta lanta hopi pregunta

ORANJESTAD – Conocido persona financiero, Milton Berlinski berdad a retira di e comision exploratorio na Aruba, cu tabata explora e posibilidadnan pa un reapertura di e refineria. Fuentenan fidedigno a confirma sinembargo, cu Berlinski a retira no awor sino for di aña pasa december caba. Mientras cu ‘oficialmente’ e motibo no ta conoci, NoticiaCla.com tin informacion, cu e hecho cu un persona di taya manera Berlinski, ta retira diripiente for di e comision, a lanta hopi pregunta. Esaki pasobra Berlinski ta, si no e unico, un di esnan cu tin mas experiencia y conocemento riba e tereno aki.

DESAROYO DI E NEGOSACION

Tin informacion cu e forma con e negociacion tabata bayendo, hunto cu e hecho cu tabatin cierto persona liga na e negociacion cu no tin bon reputacion, lo a pone cu Berlinski a tuma su retiro. NoticiaCla.com a compronde cu den e proximo dianan lo tin mas informacion mas concreto riba e retiro di Berlinski, y kico esaki lo por nifica pa e negociacion y tambe Aruba.

ROBERTO RINCON

E mesun fuentenan a mustra, cu e retiro lo tin di haber cu e detencion di e comerciante Venezolano Roberto Rincon, y cu Berlinski no tabata kier ta envolvi den un ambiente asina, den e sentido, cu e no kier ta liga cu hendenan cu por tin un record criminal. Como inversionista/bankero/homber financiero, esaki no ta bon pa su bon reputacion cu e tin na Merca.

BIAHE PA HOUSTON

Tambe ta conoci cu mientras cu Berlinski tabata forma parti di e comision exploratorio, nunca e no a biaha pa Houston (Texas) pa forma parti di e negociacionnan cu tabatin pa cu reapertura di e refineria.