Biaha cu cedula como ID entre Aruba, Corsou y St Maarten por bira posibel

PHILIPSBURG – Biaha entre Aruba, Corsou y St Maarten cu djis bo cedula, mester bira posibel den un tempo corto. Por lo menos esey ta loke un mayoria di e miembronan di Parlamento di e tres islanan kier. Nan ta reuniendo aworaki na St Maarten durante e reunion interparlamentario conoci como IPKO (Inter Parlementair Koninkrijks Overleg). Y ta durante e reunionnan aki e topico aki a keda presenta. Asina e portal Persbureau Curacao ta raporta awe mainta. 

BIAHA CU PASAPORTE

Te awor, tur e ciudadanonan di e ex Antiyas mester tabatin un pasaporte pa biaha entre e islanan. Pero e caso awor ta den man di e tres ministernan di husticia. Segun Persbureau Curacao, e ministernan en cuestion ta considera esaki un bon proposicion, pero nan kier haci un investigacion prome pa wak si no tin obhecion. Awe merdia tin un conferencia di prensa di e participantenan di e reunion aki.