Delegacion Hulandes a rechasa proposicion geschillenregeling

PHILLIPSBURG – E concepto geschillenregeling pa paisnan den Reino Hulandes, manera proponi pa delegacionnan di Aruba, Corsou y St Maarten a keda rechasa ayera pa e delegacion di Hulanda. Manera ta conoci e topico ‘controversial’ tabata riba agenda diahuebs atardi durante e reunionnan di IPKO (Inter Parlementaire Koninkrijks Overleg), cu ta tumando lugar na St Maarten. Hulanda ta considera e proposicion ‘mucho prematuro’ segun lider di delegacion Hulandes, Jeroen Recourt. Asina e matutino Antiliaans Dagblad ta raporta awe mainta den su edicion. E rechaso di Hulanda a causa disgusto grandi cerca e demas paisnan (Aruba, Corsou y St Maarten).

HULANDA SU PROBLEMA CU E CONCEPTO

Segun e informe di e matutino, e delegacionnan di Corsou y St Maarten kier pa algo pasa awor y no kier ‘warda’ mas. Pero e delegacion (via Recourt) a bisa, pa bay bek pa e gobiernonan atrobe, pa nan ta esnan cu ta tuma accion riba e topico aki. Esaki basa riba e hecho cu tin un acuerdo di nan tur cuater, pero cu ta e gobierno di Hulanda no kier tuma accion. Mes momento e ta sinti, cu un concepto di un geschillenregeling, manera esun cu e tres islanan a entrega prome cu e reunion di IPKO a cuminsa, ta prematuro. “E momento cu tres parlamentonan bin cu un propio contenido di un geschillenregeling, e union ta menasa di disparce” Recourt a bisa. E punto di e delegacion Hulandes, ta cu gobierno ta esun cu ainda tin cu move riba e topico aki segun Recourt. Y den esaki Recourt kier palabracionnan fuerte y serio, indicando cu un geschillenregeling ta necesario pa forsa accion di parti di Gobierno di Reino (Hulandes).

PROPOSICION DI PLASTERK

Manera cu NoticiaCla.com a presenta algun luna pasa caba, Minister Hulandes, Ronald Plasterk durante su ultimo bishita na Aruba, a papia di un tipo di geschillenregeling, cu Hulanda tabata dispuesto pa introduci como un medida ‘temporal’. E proposicion aki a keda rechasa unanimamente pa e delegacionnan durante IKPO, unda cu e 4 parlamentonan a bisa caba cu nan ‘no ta sinti nada pa e proposicion ey’. “Nos a bisa mas concreto ainda, cu e areglo temporal cu tabata riba mesa, no ta deseabel. Nos kier un areglo definitivo y kier pa e sosode lihe.”

REACCION CORSOU Y ST MAARTEN

Lider di partido PAIS (Corsou) Alex Rosaria a bisa, cu henter e discusion riba e geschillenregeling, - cu ta durando 6 aña caba -, a dura mucho largo. “Como tal mi no por ta di acuerdo cu e ta un ‘cuestion’ di ta prematuro. Nos ta laat!” Rosaria a laga sa. Tambe Rosaria tin e impresion, cu algun colega ta kere cu e unico cu IPKO por logra na mesa, ta eherce presion. “Pero parlamentonan tin nan propio responsabilidad tambe. Y esey ta entre otro e formulacion di concepto di ley.” Aki Rosaria ta referi na e concepto di e Ley di Reino, Rijkswet Gemeenschappelijk Hof voor Geschillenbeslechting. “Mi delegacion ta distancia su mes tambe completamente, di e hecho, cu nos ta akinan solamente pa pone mas presion.” E miembro di St Maarten tambe ta uni su mes cu e pensamento aki.

HULANDA NO KIER TRATA AWOR

Mientrastanto e delegacion Hulandes a bisa cu nan no ta planea pa papia di e contenido di e concepto cu e tres paisnan a trece, pasobra esaki ta pues mucho ‘prematuro’. “Mi ta compronde cu parlamentonan mes kier dicidi con pa yena e contenido di e areglo. Pero atrobe, esaki no ta e momento pa papia riba e contenido di un geschillenregeling.” Como tal lo no discuti e tema mas di forma plenario. Awe ta ultimo dia di e reunion y despues lo presenta e texto final di e acuerdonan logra. Merdia tin un conferencia planea, cu lo keda transmiti tambe pa miembronan di prensa. Tambe mester nota cu den e articulo di AD, no ta haci mencion di reaccionnan di miembronan di delegacion di Aruba. Lo haya esaki mas despues.