Definitivamente no tin Caiso y Soca Monarch e aña aki mas

ORANJESTAD – Definitivamente e aña aki no tin Caiso y Soca Monarch Festival mas. Durante un conferencia di prensa diahuebs anochi laat, SMAC a anuncia, cu e decision a cay cu mirando cu no tin suficiente interes di bandanan local y cu ta hopi riba man, ta oficialmente cancela e evento musical e aña aki. Inicialmente e intencion tabata, pa den curso di diabierna, dicidi si tin espacio pa toch continua. Pero despues anochi mes, a cambia di pensamento ora cu a tuma contacto cu bandanan y a nota cu no tin suficiente interes. Awor cu no tin festival mas, lo bin cu algo otro. Loke ta bin na su lugar, ta un competencia di cancion den cual bandanan por prepara (varios a traha cantica caba pa carnaval) y participa pa un premio monetario grandi. Via radio oyentenan, lo por vota y sostene e cancion participante, y e ganador lo ricibi un premio grandi financiero, cu na final lo keda otorga na e cancion, banda y cantante ganador. Asina SMAC ta duna honor toch na esnan cu a prepara pa e festival, sin cu nan ta keda perhudica.

BAÑO DI AWA FRIEU

Tabata ayera nochi durante e conferencia di prensa, cu un presidente di SMAC visiblemente desapunta, a participa cu nan a haya un baño di awa friu diahuebs, ora cu MUSICA a informa oficialmente, cu nan ta ‘entrega’ e encargo pa organisa e festival e aña aki. Como motibo principal a duna cu pa falta di sponsornan no por a logra. SMAC a considera esaki un mal hecho, mirando cu a wanta e organisacion carnavalesco na liña, prome cu nan a bin cu e informacion aki. Nan claramente no a aprecia e gesto aki y a keda cu un sabor hopi amargo di e fundacion MUSICA.

PLAN B Y C

Esey a pone cu a pasa e ora pa plan B, manera cu NoticiaCla.com a raporta caba di dje, ya cu inicialmente e presidente a informa caba cu MUSICA lo no organisa e festival. E plan B tabata ensera, cu lo a acerca e bandanan musical individualmente pa wak si tin interes pa nan participa toch den un eventual festival. Pero diahuebs anochi, ora cu a tuma contacto cu e bandanan, a bira conoci hopi lihe cu e interes no tey, y cu esnan cu tin interes, e tempo ta mucho cortico. NoticiaCla.com a compronde for di SMAC cu tin bandanan cu a prepara como 7 cantica pa participa, pues toch tin cu a prepara. Y ta netamente pa e gruponan aki, SMAC lo organisa un concurso, pa saca e cancion mas popular e aña aki den e forma cu a menciona. SMAC lo considera esaki como plan C. E detayenan y e suma di placa cu por gana, lo keda anuncia despues.