Programa di sterilisacion di pushi y cacho di caya un realidad pa Aruba

Posted on 1/7/2016, 11:07 AM AST | Updated on 1/7/2016, 11:55 AM AST

EAGLE BEACH – E programa di sterilisacion di pushi y cacho di caya, ta bira un realidad pa Aruba. Ta un hecho cu diferente bario na Aruba, tin keho di poblacion grandi di cachonan y pushi di caya. Esaki nos comunidad no solamente ta experencia como algo desagradabel, pero hopi di nos ta haya esaki un situacion tristo y penoso pa e animalnan aki. Aruba tin demasiado cacho y pushi cu no tin un hogar y cu ta pasa hamber. Adicionalmente, hopi cacho y pushi ta wordo mata diariamente pa falta di un hogar adecua, ta sufri di malesa y falta di cuido responsabel. Pa peaton- y ciclistanan e cachonan aki tambe ta causa peliger y ta causa daño na propiedad di hende.

SOLUCION RESPONSABEL

Mirando cu esaki ta un problema for di basta tempo, Bucuti & Tara Beach Resort conhuntamente cu tur Veterinarionan na Aruba, a uni pa asina yega na un solucion responsabel y sostenibel pa cuminsa frena e problema aki. E solucion ta ‘Sterilisacion’ di bo mascota, sea pushi of cacho. Mas cu claro, esaki ta rekeri sosten y responsabilidad di mas hopi doño di mascota posibel. Bucuti & Tara y veterinarionan ta di opinion, cu un programa di termino largo ta e unico solucion pa e problema aki. Bucuti & Tara su compromiso ta pa sostene e campaña aki pa algun aña. Ta di aplaudi y gradici e cooperacion ricibi di tur veterinarionan na Aruba, cu a facilita e programa aki dunando un prijs special.

PAKICO E OPERACION

E operacion aki ta un elemento esencial pa ta un doño responsabel. Tambe e operacion ta contribui, na frena poblacion dimas di pushi y cacho di caya y ta un beneficio importante pa e salud di e bestia. E operacion di sterilisacion ta consisti di remove e organonan reproductivo di e pushi of cacho, sea homber of muher.

E bentahanan di sterilisacion/operacion di bo mascota ta uno sumamente positivo. E operacion ta contribui na e bestia:

Tin un bida mas largo Ta mas resistente na malesa Ta mas loyal No mas puppies indeseabel

DESCUENTO

Pa cu e programa aki, Bucuti & Tara Beach Resort conhuntamente cu tur veterinario, ta haci posibel pa ricibi un descuento special pa cumpli cu e operacion aki. E operacion ta solamente valido pa cachonan crioyo. Bucuti & Tara ta paga un porcion grandi di e costonan di operacion, pa permiti doñonan di pushi of cacho ricibi un descuento remarkabel. Adicionalmente, Bucuti & Tara ta duna ‘microchips’ na e pushi of cacho. Esaki ta wordo implanta durante e operacion, pa asina e cacho por wordo registra debidamente.

PRIJS SPECIAL

E prijs special aki ta lo siguiente:

Cacho homber      Afl. 75,   Cacho muher        Afl. 100,   Pushi homber       Afl. 25,   Pushi muher         Afl. 70.

Pa por yega na remarke pa e prijs special, ta necesario pa tur doñonan di pushi y cachonan crioyo, registra pa e programa aki. Por registra na tur veterinario na Aruba, ImSan of online na www.stimamisterilisami.com. Na e momento cu registra, voluntarionan ta ricibi e formulario di registracion y lo tuma contacto cu e doño di mascota. Cada registracion ta ricibi un codigo. Cu e codigo aki e doño di e mascota por tuma contacto cu su veterinario preferi y traha cita; Veterinaire Kliniek Aruba, Contreras Veterinary Services, Animal Care Clinic y Animal Health Veterinary Hospital.

USO DI E PROGRAMA

Bucuti & Tara ta spera cu nos comunidad haci uzo di e programa aki y pa hunto yuda reduci pushi- y cachonan di caya. Bucuti & Tara Beach Resort ta gradici Sra. Yessy Arends di ‘Aruba Mutts’ pa presenta e concepto di e programa aki. Finalmente ta di remarca, cu e programa tambe ta beneficia tur otro organisacion caritativo, cu tambe ta traha pa reduci cachonan di caya. E programa aki, lo aporta na reduccion di e organisacionnan su costonan y ta facilita e proposito pa tambe opera mas pushi y cachonan di caya posibel. Pa mas informacion y registracion por bishita: www.stimamisterilisami.com