KvK ta reacciona riba mail priva cu a leak den media

Oranjestad – Camara di Comercio y Industria (KvK) a tuma nota di algun articulo, cu a sali recientemente den prensa, relaciona cu un comunicacion priva entre un miembro di directiva di KvK y un cliente di dicho miembro. Den e articulonan ta insinua, cu e miembro di KvK en cuestion, ta liga na un partido di oposicion y cu esey lo por influencia e posicion di Camara di Comercio. Den e comunicado di Camara di Comercio, nan ta lamenta cu ta usa comunicacion priva di un ciudadano, pa cuestiona e integridad di e persona y tambe di KvK. Segun KvK, ta duna e impresion cu e intencion ta pa purba atacha e credibilidad y /of imparcialidad di Camara di Comercio y pa hinca e institucion den un esfera politico. KvK di su banda, lo sigui apoya desaroyonan positivo y expresa su opinion tambe pa cu asuntonan negativo. Pues e publicacionnan cu a sali, lo no afecta e 'modus operandi' di KvK. Te aki e reaccion di Camara di Comercio.