SMAC a duna MUSICA ultimatum te diaranson merdia

ORANJESTAD - Fundacion MUSICA tin te diaranson merdia 12, pa dicidi si nan ta tuma oferta di fundacion SMAC pa organisa "Caiso y Soca Monarch Festival 2016". Si Musica no acepta e proposicion, SMAC mes ta organisa e festival. Esey e presidente di e Fundacion di Carnaval, Randy Thiel a informa Prome Minister Mike Eman, como contesta di e proposicion, cu gobierno a manda mas prome diamars. E ta nifica cu pa diaranson merdia, mester bin un claridad final riba henter e problema cu a surgi diamars den dia, cu a resulta den un bay bin di corespondencia, y a bay te asina leu cu un minister lo a menasa di entrega su retiro, si Conseho di Minister no sostene den e caso aki. MUSICA mientrastanto lo a yama un reunion cu su miembronan, pa mayan anochi 7:30pm na DTI na San Nicolas. 

CONDICION DI SMAC

Den e carta pa prome minister, Thiel ta mustra cu e sugerencia cu Eman a manda, ta netamente loke cu SMAC tabata boga p'e, pero no tabata haya oido di MUSICA. Pa Thiel, e condicion pa MUSICA organisa e festival ta, cu SMAC no ta asumi ningun responsabilidad, pa debe cu wordo crea ni contractonan cu wordo cera pa e festival aki. Cu e condicion ey, SMAC ta dispuesto pa laga MUSICA organisa e festival un biaha mas na 2016. Un oferta cu tabata riba mesa for di 2015, pero cu segun Thiel pues, MUSICA no kier a acepta y no tabata reacciona ariba. 

CARTA DI PROME MINISTER PA SOLUCIONA PROBLEMA

Tabata atardi cu gobierno a cay den e polemica aki, mandando un carta, cu un solucion pa ambos partido, na bienestar di carnaval di Aruba. Cu esaki, un biaha mas carnaval ta cuminsa cu un mal pia y tin cu haya intervencion di gobierno, pa por soluciona un problema cultural, cu ultimo dos añanan no a pasa den su miho momentonan.