No obstante resistencia di minister, proyecto ta sigui

ORANJESTAD – Despues e boutique hotel na Malmok, Ocean Z a haye den problema legal, pa construccion no apropia hotelero, e proximo proyecto hotelero cu por haye den problema ta e proyecto di condominio y hotel na Bubali di Palm Aruba Group cu ta ensera un Marriott Residence Inn. NoticiaCla.com a acerca e mandatario di turismo Otmar Oduber, pa su comentario y esaki a sigura NoticiaCla.com, cu e ta fuertemente contra e proyecto aki. Di otro banda, NoticiaCla.com a compronde cu ta propio colega Minister Sevinger, lo ta pushando e proyecto aki pa e bira un realidad. E idea ta pa unabes e proyecto ta completa, pa e tin un cantidad di camber di hotel extra (271), combina cu 106 condominium y mas proyecto, tur den uno. Tur situa na Bubali banda di Chens supermarket y e restaurant chines.

GRUPO TA LOGRANDO NO OBSTANTE OBHECION

Den su reaccion pa e portal aki, e mandatario a confirma, cu e grupo menciona tin intencion enberdad di bin cu un proyecto asina, y cu nan lo ta logrando aparentemente. Problema ta , -manera cu por a compronde-, cu Sevinger mes lo ta yudando cu permiso (infrastructura) y ta e lo ta 'pushando esaki' pa e bira un realidad. “Ami ta fel tegen. Contra! Y mi a bisa esey den varios occasion,” Oduber a sigura NoticiaCla.com dialuna anochi.

PAKICO CONTRA E PROYECTO

E motibo cu Oduber ta contra ta e ubicacion di e proyecto, esta e caminda cu e ta situa y tambe e tipo di acomodacion ‘super barata’ cu e ta. “E ta in grupo di desaroyadornan cu kier bin cu Residence Inn eynan,” Oduber a bisa. El a reuni na diferente occasion cu nan y a bisa nan, cu gobierno no ta sostene e tipo di hotelnan aki y ta prefera pa enfoca riba turista di calidad. “Nan ta bon na altura di esaki,” Oduber a bisa. No obstante esey, a compronde cu e grupo di desaroyado ta cerando y cu nan lo bay door cu e proyecto. NoticiaCla.com a compronde cu e grupo aki, lo a te hasta haya bouwvergunning aunke no por a confirma esaki. Pregunta ta, si nan lo haya un hotelvergunning tambe pa opera esaki.

PROBLEMA CU 'OCEAN Z'

Manera ta conoci, comienso di luna pasa, e boutique hotel a haya su mes den corte, ora cu un grupo di ciudadano a bringa e operadornan y desaroyadornan di e hotel, cu nan lo ta actuando ilegalmente. Huez den e caso ey, a impone un medida temporal vigente mesora, parando tur operacion di e hotel mesora, te por lo menos 13 di januari proximo, ora cu lo continua cu e caso. Den e caso di Bubali, no ta descarta cu esaki tambe lo por bay den un direccion asina, mirando cu tin resistencia (parcial) de gobierno pa cu e proyecto aki. No a logra haya reaccion di Minister di Infrastructura Benny Sevinger ainda.