Corte a cuminsa pone beslag y freeze cuentanan di Roberto Rincón

HOUSTON, TEXAS – Un huez na Houston a cuminsa duna ordo pa freeze propiedadnan y cuentanan bancario di e comerciante Venezolano deteni Roberto Rincon y su socio Abraham Shiera rond mundo. Asina conocido periodista investigativo, Casto Ocando a tweet for di Miami. E prome tres cuenta di Rincón cu a keda ‘congela’ ta na Suiza, mientras cu di Shiera, a duna ordo pa tuma e yate di 73 pia den beslag. Rincón tin propiedad tambe na Aruba, pero no ta conoci si lo pone beslag riba nan tambe, den cuadro di e investigacion. Den e orden di aresto sinembargo, a haci mencion specifico di propiedadnan di e comerciante cu e tin na Aruba. Na Aruba, fuera di un declaracion di Minister Mike de Meza, otro mandatarionan ta keto riba e topico aki. Lider di fraccion di MEP, Evelyn Wever den un conferencia di prensa a remarca riba e silencio aki y a puntra 'ki dia Mike Eman ta bay kibra silencio riba e tema aki?' Gobierno di Aruba a admiti recientemente na NoticiaCla.com, cu nan conoce Rincón y cu el a yuda cu e negosacion pa haya CITGO na mesa, pa un posibel reapertura di e refineria. 

ORDEN DI ARESTO

Recientemente NoticiaCla.com a raporta, cu corte Mericano a confirma importancia di Aruba den e caso di Roberto Rincón. Esaki NoticiaCla.com a compronde e siman aki, di e oficina di huez Nancy Johnson, cu a firma e orden di aresto pa e comerciante Venezolano, cu dos siman pasa a keda deteni na Merca, pa soborno y labamento di placa. Cada bes, mas informacion ta bira conoci segun e caso ta desaroya. Mientras cu siman pasa, e mandatario di energia Mike de Meza, a confirma na NoticiaCla.com cu e conoce Rincón, e no kier a bay den detayes di su envolvimento cu e comerciante na Houston, Texas. Ora cu a puntra e mandatario riba parti ey, e mandatario a reacciona bisando cu ‘ta buscando cos unda cu no tin.’

BIAHENAN PA HOUSTON

Sinembargo, mas y mas informacion ta circulando di biahenan, cu un delegacion di Aruba lo a haci pa Houston, Texas, cu lo ta inclui e mandatario, acompaña pa un otro colega y hefenan halto di algun NV di utilidad. E mandatario, siman pasa, a bay asina leu di admiti di a papia cu Rincón na Houston, Texas, durante su bishita, pero no a bay den detayes, si e bishitanan ey tabata paga pa Rincón of no.

HOSPEDAHE CUBRI? 

Di fuentenan cerca di e grupo, cu a biaha pa Houston, Texas, NoticiaCla.com a compronde, cu ta e comerciante Venezolano mes lo tabata esun, cu lo tabata manda avion pa e delegacion di Aruba biaha pa Merca, cubri hospedahe y tur otro gasto. Esaki ta importante mirando, cu ta netamente esaki, ta loke cu Rincón ta wordo acusa di dje, esta soborno di personanan di nivel halto industrial y gubernamental. Mientras cu no ta haci mencion specifico, di gobernantenan di cua pais, ta conoci cu Merca a bin ta sigui tur paso di Rincón pa varios aña, y esey ta inclui, tap telefon, y busca e asina yama ‘papertrail’, cu Rincón posiblemente lo a laga atras.

LINK CU CARVAJAL

Mas y mas, e informacion cu ta keda ripiti, ta e coneccion di Rincón cu Aruba, pa medio di su ‘amigo’ Hugo Carvajal, cu a bin Aruba, riba avion di Rincón, na juli di 2014. Ta hopi cla awor, cu ta for di e momento ey, Merca a cuminsa investiga e pasonan di Rincón, cu nos isla. Prome cu esey, Aruba no tabata riba e ‘mapa’ di investigacion.

IMPORTANCIA DI ARUBA DEN CASO RINCÓN

De hecho, investigacion cu NoticiaCla.com a haci te na Houston,Texas, ta confirma durante un conversacion cu un representante di e oficina di e huez cu a firma e orden di detencion, Nancy Johnson na Houston, Texas, dia 19 di december ultimo. E persona a confirma, cu enberdad tanto e amistad cu Carvajal, y e hecho cu Rincón tin residencia na Aruba, tabata importante pa wordo inclui den e orden di aresto. “Pero e motivacion pakico exacto, e huez lo no bisabo,” e representante di e oficina a bisa NoticiaCla.com.

BISHITA FRECUENTE PA ARUBA

Recientemente, algun medio Venezolano a raporta, cu un di Rincón su destinacionnan frecuente tabata Aruba. De hecho, entre 2011 y 2013 su avionnan a keda registra 28 biaha na Aruba. Ta trata di e dos avionnan di e compania di su yiu homber, esta e Cessna Citation N9GY y N99GY. For di mas investigacion, haciendo uso di e asina yama FOIA (Freedom of Information Act), esaki a permiti acceso na informacion no publico. E obhetivo tabata, pa haya detayes di e buelonan di e avion N9GY, cu tabata e mesun avion, cu na juli 2014 a trece Carvajal Aruba. E avion mes a permanece riba nos isla pa 2 dia.