Colombia a aproba ruta nobo pa InselAir Aruba pa e.o. Cali

MEDELLIN – Tres aerolinea, -entre nan InselAir Aruba-, a haya aprobacion di Aeronautica Civil, pa opera 16 ruta nobo nacional y internacional. Asina e portal El Colombiano a raporta dialuna. Fuera di InselAir Aruba, e companianan VivaColombia y Air Europa Lineas Aereas SA (Sociedad Anonima) lo por uza e rutanan aproba. Tabata 10 di december ultimo, cu e grupo evaluado di e entidad aeronautica a reuni den audiencia publico, y a aproba e trayectonan pa mobilisa pasahero y post pa e tres aerolineanan aki.

INSELAIR ARUBA y AIR EUROPA

Pa loke ta InselAir Aruba, e por bula dos frecuencia semanal pa e trayecto Aruba-Cali-Aruba, y Aruba-Bucaramanga-Aruba. Mes momento Air Europa Líneas Aéreas Sociedad Anónima por opera e ruta Madrid-Bogotá-Madrid 7 dia di siman.

VIVACOLOMBIA

E aerolinea VivaColombia a keda cu 13 ruta asigna di cual 4 ta internacional (Medellín-Cancún-Medellín, Cali-Panamá-Cali, Bogotá-Corsou-Bogotá y Bogotá-Santo Domingo-Bogotá). E restonan ta nacional pa nan y lo ta 7 dia pa siman entre Medellín-Cúcuta, Bucaramanga-Cartagena, Bogotá-Valledupar, Bogotá-Leticia, Bucaramanga-Cúcuta, San Andrés-Pereira, Bogotá-Armenia, Medellín-Armenia, y Cartagena-Armenia.

CONECTIVIDAD

Director di Aerocivil Gustavo Lenis, a afirma cu e politica aereo comercial di Colombia, a aproba e rutanan cu ta representa oportunidadnan nobo pa conectividad aereo pa e pais. A splica tambe, cu ora cu tin un caida den economia, e demanda di buelo ta reduci y hopi avion ta keda tera sin por produci. Y ta den e medida ey, e companianan aereo ta prefera pa bula otro ruta.

AUDIENCIA

Durante 2015, InselAir hunto cu otro aerolineanan, manera Air Panamá, Aruba Airlines, TAM, Delta Air Lines, American Airlines, Iberia y Air Europa, a haya trayecto aproba. Na 2015 tambe a habri 17 trayecto cu 68 frecuencia semanal tambe.