Aeropuerto a procesa mas cu 27.000 pasahero den weekend

ORANJESTAD – Aeropuerto di Aruba, esta Aruba Airport Authority N.V. (AAA) a cuminsa 2016 di un forma positivo, atendiendo 27.250 pasahero y 363 movecion di trafico aereo den e prome weekend di 2016, conoci como “super weekend”. E prome fin di siman despues di aña nobo, historicamente, ta e temporada mas ocupa pa trafico di pasahero na Aeropuerto Internacional Reina Beatrix, mirando e cantidad di pasahero cu ta yega y sali for di Aruba, despues di e temporada di fin di aña.

COORDINACION Y PLANIFICACION

Naturalmente, un fin di siman asina druk, a rekeri bon planificacion y coordinacion entre tur 'stakeholder', departamento y empleado na aeropuerto. E esfuersonan haci, prome cu e fin di siman aki en particular, a duna resultadonan hopi positivo, mirando e hecho, cu aunke tabata un fin di siman hopi druk, unda cu a atende e cantidad grandi di pasahero y avion den e periodo di 2 dia, e operacionnan a mantene e nivelnan mas halto di seguridad, hunto cu procesamento di pasahero eficiente y efectivo, resultando den un experiencia positivo, pa e miles di personanan biahando door di nos aeropuerto.

COORDINACION

E resultadonan aki, ta tuma un cantidad tremendo di coordinacion, planificacion y compromiso, di parti di un cantidad di 'partner' di aeropuerto, y e resultado di e fin di siman tras di lomba, no lo por tabata posibel sin e esfuersonan di e.o. US Customs and Border Protection, Imigracion Local (IASA), Departamento di Border Police na aeropuerto, Douane di Aruba, Air Navigation Services Aruba N.V. (ANSA), Aruba Tourism Authority (ATA), e aerolineanan, e ground handlernan, Departamento di Transporte Publico (DTP), e taxistanan, operadornan di concession y F&B, ASAP Services, y mucho mas.

COMENTARIO DI CEO

CEO James Fazio a bisa: “E ingrediente principal pa e "super weekend" exitoso ta, e teamwork door di tur e partnernan di aeropuerto. Tambe, e ultimo ekiponan tecnologico cu a wordo poni na aeropuerto, a yuda tremendamente pa atende e cantidad di pasahero den tempo record. E tabata impresionante, pa mira cada empleado, bai e extra miya, pa sigura e servicio adecua na nos pasaheronan y mi kier gradici cada un persona, cu a haci un diferencia durante e "super weekend"! E ta impresionante kico por wordo logra cu e focus y compromiso corecto. Bon trabou tur hende!”