Venezuela su Asamblea Nacional tin presidente nobo

CARACAS – Mayan Venezuela lo conoce e cambio cu nan a vota p'e comienso di luna pasa (6 december 2015), esta un Parlamento nobo forma den mayoria pa e miembronan di oposicion. Na Venezuela, e Parlamento yama Asamblea Nacional. Hopi ta spera problema ora cu tanto miembronan di oposicion, como di gobierno marcha pa e asamblea, unda cu por spera confrontacion. Diadomingo tabatin eleccion di e presidente nobo, cu a keda den persona di Henry Ramos Allup, eligi cu 62 voto (di e 111 voto emiti).

CONTRINCANTE

E ‘contrincante’ di Ramos, coordinador nacional di Primero Justicia, Julio Borges a ricibi 49 voto na fabor. A specula cu e votacion secreto por a duna Borges un bentaha, den practica e votamento a bay segun liña di e partidonan Un Nuevo Tiempo y Voluntad Popular y algun factor minoritario, cu a haci un aliansa cu AD.

CONFRONTACION

E problema premira ta mayan, ora cu e asamblea tuma poder cu e constelacion nobo. Tanto esnan di gobierno, como opositornan a haci un yamada pa marcha, pa bay e asamblea, locual por crea un confrontacion cu por bira un problema.