Salario igual pa tur parlamentario den Reino Hulandes

DEN HAAG- Salario igual pa miembronan di tur cuater Parlamento den Reino Hulandes, basa riba e salario promedio ('average') di e respectivo pais. Esey ta e proposicion cu Parlamentario Ronald van Raak (Socialistische Partij), kier introduci durante e reunionnan bi-annual IPKO (Inter Parlementair Koninkrijks Overleg) na St Maarten, cu ta cuminsa dia 5 di januari awor.

MUCHO HOPI PLACA

Segun van Raak, miembronan di Parlamento no mester gana asina hopi placa, pasobra salario halto ta atrae hende cu ta solamente interesa den ‘representa hende pa placa’. “Salario halto ta atrae hende cu stima placa mucho hopi,” van Raak a bisa e corant di St Maarten, Daily Herald, prome cu e biaha pa St Maarten diadomingo. E kier uza e proposicion pa tuma medida, pa preveni soborno y bulamento di cura. E tabata hopi positivo riba e proposicion pa aumenta e tarea di e partidonan politico y pa fortificanan. “Soborno ta cuminsa cu politiconan cu por wordo cumpra. Partidonan politico por hunga un papel hopi importante den educa nan miembronan. Partidonan mester ricibi un subsidio pa entrena nan hendenan. Politica ta un profesion cu ta rekeri entrenamento,” van Raak a sigui bisa.

SALARIO NIVELA

Segun van Raak, salarionan mester wordo ‘nivela’ pa preveni cu hendenan por drenta Parlamento pa e salario. P'esey e ta bin cu su proposicion. Esey kiermen cu e salario pa e parlamentario na St Maarten lo mester bira 3.000 dollar y esun di Hulanda 3.000 euro. Actualmente parlamentarionan na Hulanda ta ricibi 7.000 euro pa luna, mientras cu parlamentarionan di St Maarten ta ricibi 10.000 dollar pa luna, cu segun van Raak, ta astronomico. “Nos mester di politiconan cu no ta wordo motiva pa e placa y cu no ta sensitivo na soborno,” e parlamentario Hulandes a bisa.

EFECTO DI PROPOSICION

Si parlamentarionan aproba e proposicion, esaki lo nifica pues cu tur miembro di Parlamento ta gana e mesun salario, basa riba e entrada promedio di nan pais. Mester menciona cu e partido di van Raak, tin un sistema caba unda cu miembronan ta inverti den nan propio partido, ta entrega porcion grandi di nan salario na e partido y ta ricibi un salario cu ta solamente un poco mas cu e entrada promedio. “Nos ta inverti den nos propio partido,” van Raak a finalisa bisando.