Polis a entretene muchanan den vakantie grandi

ORANJESTAD, Aruba – 30 di juli 2014: Durante vakantie grandi di scol e departamento di relacion publico y conscientisacion, hunto cu e teamnan di K9 y Mobiele Eenheid tabata hopi activo cu actividad educativo y informativo. Ya caba prome cu vakantie a cuminsa diferente scol y gruponan di tra’i merdia a haci peticion cerca Cuerpo Policial pa duna demostracion y asina trece e mensahe di prevencion di crimen na nos muchanan. Un punto hopi importante, segun vocero suplente di Cuerpo Policial, Liliana Rasmijn ta splica, ta e mensahe “Polis ta bo amigo”. Esaki a core manera e “linea cora” den tur presentacion pa asina conscientisa e muchanan tocante e rol di polisnan den nos comunidad como esunnan cu no t’ey pa spanta nos muchanan, pero pa yuda nan na tur momento y den tur situacion. E presentacionnan durante vakantie a tuma luga na diferente luga, pero tambe cada uno tabata diseña di acuerdo cu e edad di esunnan presente y e deseonan di e grupo. Tres presentacion cu a hala hopi atencion tabata esunnan pa Sonrisa, pa Museo Arkeologico y pa OPPA, e asociacion di trahadonan publico pensiona.

(Sonrisa di bishita)

Den e caso di Sonrisa, Cuerpo Policial no a bishita nan camp, pero a ricibi e grupo na Warda di Polis na Macuarima, unda cu nan a haya un bista den e trabao diario di tur e departamentonan cu ta ubica na e warda aki. Na final di e recorido den e warda, como e asina yama “cherry riba e bolo”, agentenan policial tabata warda cu tres patruya cla y a invita e hobennan pa dal un rond den e bario cu sirena cendi, manera VIP. Nan a hala masha hopi atencion riba caminda y tabata pa Cuerpo Policial un placer hopi grandi pa experencia nan alegria na final di e trip.