Caso di asesinato na Moontjiweg na Corsou

WILLEMSTAD - Den apenas 3 dia, Corsou ta conoce su di dos caso di asesinato. E caso di tiramento (cu a resulta despues den un dama morto) a keda registra alrededor di 12:45am, na momento cu central di polis, a ricibi notificacion cu riba Moontjiweg, crusada cu Helmin Wiels Bulevard, lo mester tin tiramento y cu persona herida. Na yegada di prome patruya y tambe ambulance, nan a topa cu 4 persona herida den un Volkswagen Passaat blanco. Ta trata di dos adulto, un homber y un muhe y tambe dos menor di edad cu diferente bala. Paramediconan di FKA, a transporta tur 4 victima bou di estado di atencion, pa policlinica di Sehos. E dama adulto a fayece despues, a consecuencia di e heridonan di e incidente. 

LOSMENTO DI BALA

Di acuerdo cu informacion preliminar, lo tabata tin losmento di bala for di riba Moontjiweg, y aki chauffeur lo a sigi bai dal e Volkswagen Passaat blanco riba Helmin Wiels Bulevard den un vangrail. Tin varios huls benta na e sitio. TFO (nomber nobo di THOD) ta bai inicia, cu e investigacion den e caso aki. Polisnan a bai policlinica tambe, pa sa estado di e 4 heridonan enbolbi den e tiramento aki.