KPA: Cadaver kima den auto ta di un hende homber

ORANJESTAD - E cadaver kima den auto awe mainta na Franse Pas ta di un hende homber. Esey autoridad policial a informa diahuebs atardi. Manera ta conoci, awe diahuebs despues di 7:00am ora cu takelwagen a bay busca un auto kima den Franse Pas a descubri un curpa kima den bahul di e auto marca Chevrolet modelo Celta number A-14568. Mesora a start un investigacion, encabesa pa Ministerio Publico y haciendo uzo di e ekipo investigativo di Cuerpo Policial Aruba.

MANDA CURPA PA HULANDA 

Den oranan di merdia, despues cu e ekipo di investigadonan a reuni, a dicidi cu ta manda e curpa Hulanda pa un investigacion forensico, mirando e estado avansa di kemadura den cual a encontra e cadaver. Pa awor e unico cos cu por a saca afor na Aruba ta cu e cadaver ta di un hende homber. Na mes momento Cuerpo Policial Aruba y Ministerio Publico a lanta un ekipo "TGO", cu ta un grupo di expertonan riba diferente experticio, pa conduci e investigacion. Ta haci un apelacion na cualkier persona cu por tin mas informacion, pero cu kier keda anonimo, pa yama e tipline 11141. Si acaso ta desea di duna informacion na Polis y no ta interesa den anonimidad, por yama libremente na e celular 5975184. Cuerpo Policial Aruba ta manda palabranan di condolencia na famia di e fayecido, aunke ainda no por logra identific'e.