Aruba representa den campeonato mundial di Beach Tennis

ORANJESTAD - E siman aki a sali rumbo pa Cervia – Italia e team femenino cu ta representando Aruba pa prome biaha den e campeonato mundial di Beach Tennis. Aki nos ta referi na Marieke Buuts y Betza Rasmijn. E pareha aki actualmente ta e #1 y #2 localmente y riba e ranking mundial nan ta na # 20 y # 104. Durante e campeonato aki, paisnan grandi manera Italia, Brazil, Rusia, Venezuela, Francia, Japan, Alemania, USA, Slovakia, Puerto Rico, Australia, Hungria y Suisa tambe ta participa. Aruba no ta keda tras y ta para na # 17 den tur e teamnan cu a inscribi pa e campeonato aki cu a haci posibel cu no mester a participa durante e ronda nan pa cualifica pero lo hunga directamente den e “main draw” di e campeonato.

Marieke Buuts ta un di e 3 instructornan certifica na Aruba pa por duna training den e deporte aki. Marieke a nace na Hulanda pero a haci Aruba su cas pa mas di 9 aña caba. El a cuminsa practica e deporte aki na aña 2008. Cu bastante experiencia internacional, Marieke ta carga e titulo di capitan pa e team femenino y tambe ta e persona encarga actualmente cu henter e preparacion y training di e seleccion local.

Betza Rasmijn, un persona no desconoci na Aruba den e mundo di deporte, muy en particular den volleyball y softball. Desde februari 2012 cu el a regresa di Corsou, el a cera conoci cu e deporte aki y nunca mas a stop. Su experiencia di 13 aña den volleyball sigur ta un adkisicion importante pa su exito te awor den e deporte di Beach Tennis. E disciplina di Beach Tennis a cuminsa basta aña atras na Aruba pero cu pa hopi ainda no ta conoci. E ta un combinacion di tennis, badminton y beach volleyball. Sigur un sport cu ta creciendo rond di mundo henter. Siman pasa a tuma luga e Campeonato Mundial di Team cual a tuma luga na Moscu, Rusia. Ta premira cu pa den un futuro hopi cercano e deporte aki lo ta parti di Weganan Olimpico.

E representacion di Aruba den campeonato mundial di Beach Tennis no lo tabata posibel sin e sponsornan cu a pone nan confiansa den e deporte y e representantenan di nos isla. Aki mester gradici Aruba Tourism Authority, por medio di Minister Otmar Oduber, ECO Tech, ATCO, Manrique Capriles, Arubook y Garage Centraal. E participantenan ta yama danki na nan tur, pa nan sosten, confiansa y pa demostra cu nan tur ta un bon ciudadano corporativo riba nos isla. Nos lo keda pendiente pa mas detaye y resultado di e Campeonato Mundial aki cual lo cuminsa diabierna awor pa e team di Aruba.