Venezuela ta e pais mas violento di Latino America pa 2015

CARACAS – E estimacion di e organo, cu ta compila dato di casonan violento na Venezuela, esta e OVV (Observatorio Venezolano de Violencia) ta mustra cu pa fin di 2015, e pais bisiña lo tin 27.875 morto violento (asesina), cu ta ekivalente na 90 morto pa cada 100.000 habitante. Na 2014 e observatorio a conta ainda 'solamente' 24.980 morto den e pais di casi 33 miyon habitante. Asina coresponsalnan di NoticiaCla.com na Venezuela ta raporta. Y si tene na cuenta, cu pa tanto Latino America y Caribe e cifra total lo ta 145.000 di cual 19% ta di Venezuela, esaki ta nifica cu un di cada 5 asesinato, ta un Venezolano.

PAIS MAS VIOLENTO

E tasa aki pone Venezuela facilmente, como e pais mas violento di America Latino, despues di conoce cifranan violento di paisnan manera Honduras y El Salvador, pues Honduras, cu aña pasa tabata na prome lugar a conoce un caida importante. El Salvador di otro banda, a conoce un aumento drastico, cu ta pone cu e lo por ta igual na esun di Venezuela. Ta bon pa nota cu OVV ta un organisacion no gubernamental. E ta un organo cu a nace di e Laboratorio de Ciencias Sociales (Lacso) y e tin vinculo cu universidadnan di Venezuela.