Aeropuerto ta cla pa procesa mas di 25.000 pasahero e weekend aki

ORANJESTAD – Cu tecnologia adicional, aeropuerto di Aruba ta sigura, cu nan lo sigui mehora e fluho di pasahero di e 25.000+ pasahero, cu ta wordo spera e fin di siman aki. Manera ta conoci, 2015 ta yegando su fin, pero Aruba Airport Authority N.V. (AAA) ya ta prepara pa e fin di siman di mas druk pa 2016 yama 'Super Weekend' (2 y 3 di Januari 2016), unda ta spera mas di 25.000 pasahero pa wordo procesa entre diasabra y diadomingo.

TRAHANDO DURO

Segun e comunicado di e gerencia di aeropuerto, AAA tin basta tempo trahando duro y a finalisa cu diferente proyecto haciendo uso di tecnologia pa sigui automatisa su facilidadnan di 'Border Control', cu un inversion di $2.25 miyon den gate nan di 'Automated Border Control' y kiosconan di 'Automated Passport Control'. Esakinan ta net na tempo pa por atende 'Super Weekend'.

GATENAN DI 'AUTOMATED BORDER CONTROL'

AAA a instala gatenan di 'Automated Border Control' (ABC) adicional pa e proceso di imigracion pa 14 e-gates; 6 pa yegada y 8 pa salida US y Non-US. E ABC-nan lo permiti pasaheronan cu tin un e-passport, pa wordo procesa door di un sistema automatisa, cu ta lesa paspoort, cu ta conecta cu e sistema di 'border management' di imigracion local; y ta inclui e ultimo avance den reconocimento facial biometrico; mehorando dramaticamente e tempo pa procesa un pasahero. E ABC-nan adicional, lo posiciona aeropuerto pa expande su proyecto, cu a ricibi premio 'Internacional Happy Flow', cu su partnernan Vision Box, Schiphol Group, KLM y Gobierno di Aruba.

KIOSKONAN DI 'AUTOMATED PASSPORT CONTROL'

AAA a inverti tambe den e instalacion di 12 kiosco di 'Automated Passport Control' (APC) mas den e area di 'US CBP pre-clearance'; hibando e total na 22 kiosco, despues di a instala exitosamente 10 kiosco di APC na December 2014 y e inversion a duna resultado impresionante, motivando aeropuerto pa sigui expande e programa. Adicionalmente, e kioskonan nobo cu ta bin di e compania YVR 'Innovative Travel Solutions', awo ta inclui algun 'upgrade' cu ta inclui reconocimento facial y e abilidad pa procesa esnan cu tin Visa, mehorando e seguridad general di e trabounan di 'US border', y mehorando e experiencia di e pasahero. “Den e añanan anterior, nos “high seasonnan” a wordo asocia cu filanan largo na aeropuerto. Nos ta sigur cu e implementacion di gate nan adicional ABC y e kiosconan APC y e mehoracionnan den seguridad y eficiencia hunto cu e cooperacion di nos partnernan, lo percura pa un experiencia mehora na aeropuerto, specialmente durante 'Super Weekend',” segun CEO di AAA, Sr.James Fazio.