Comediante Bill Cosby liber riba fiansa di 1 miyon dollar

CHELTENHAM, PENNSYLVANIA (U.S.A.) – E conocido comediante Bill Cosby (78) ta liber awe tardi, despues di a paga un fiansa di 1 miyon dollar. El a keda acusa formalmente awe mainta, di asalto indecente grave pa e fiscal di e condado unda cu e ta biba actualmente. Atardi e mester a presenta na corte, pa scucha personalmente kico e cargo(nan) ta contra dje. Cosby no a declara nada, sino solamente scucha e cargonan y mester a entrega su pasaporte. Despues el a bay warda di polis di Cheltenham, unda cu a procesa e comediante y saca e potret comun di prison. E proximo presentacion di Cosby den corte lo ta dia 14 di januari proximo.

E CARGONAN

E cargo ta uno di 2004, ora cu segun e keho di un dama, Cosby lo a droga e persona y tene relacion sexual inapropia cu ne, contra boluntad di e dama. E keho tin un valides di 12 aña, cu ta vence na januari 2016. Pero segun corte, informacion nobo cu a keda presenta na juli di e aña aki, a pone cu a habri e caso aki atrobe (a cera esaki inicialmente ora cu partidonan a yega na otro), y awe mainta presenta e cargonan criminal contra e comediante. E comediante semper a desmenti tur acusacion contra dje, cu por cierto tabata di mas di 50 muher cu a bin dilanti. Si haya Cosby culpabel, e por haya un castigo di 10 aña di prison y un multa di 25 mil dollar. Foto Kena Betancur/AFP